ДЕҲЛИ, 22 апрель. /“Дунё” АА/. Ўзбекистон элчихонасида ахборот технологияларидан тортиб қуёш панеллари ишлаб чиқаришгача бўлган соҳаларда фаолият юритувчи 30 дан ортиқ ҳинд тадбиркорларини жамлаган давра суҳбати бўлиб ўтди, деб хабар бермоқда “Дунё” АА мухбири.

Учрашувда Ҳиндистон компаниялари сунъий интеллект, киберхавфсизлик, электроника, ҳунармандчилик хабларини ташкил этиш ва бошқа соҳаларда қўшма лойиҳаларни ишга туширишга тайёр эканини билдирди.

Ҳиндистон ишбилармон доиралари вакилларига Ўзбекистондаги эркин иқтисодий зоналар ва саноат паркларида фаолият юритиш учун яратилган қулай шароитлар, хорижий инвесторларга тақдим этилаётган солиқ имтиёзлари ва бошқа преференциялар, IT-парклардаги стартапларни қўллаб-қувватлаш бўйича давлат томонидан кўрилаётган чора-тадбирлар ҳақида батафсил сўзлаб берилди.

Рақамли технологиялар ва сунъий интеллект соҳасидаги сиёсатга алоҳида урғу берилди.

Ўзбекистон Марказий Осиё бозорларига чиқишни истаган Ҳиндистон IT-компаниялари учун минтақавий хаб сифатида қаралаётгани қайд этилди.

Ҳинд тадбиркорлари энергетика, рақамлаштириш, қишлоқ хўжалиги ва ҳунармандчилик соҳаларидаги шериклик истиқболларини катта қизиқиш билан муҳокама қилди.

Хусусан, энергия самарадорлигини ошириш, истеъмолни оптималлаштириш, электр батареялари ва қуёш панеллари ишлаб чиқариш, илғор IT-ечимлар жорий этиш, киберхавфсизлик ва сунъий интеллект соҳасида кадрлар тайёрлаш ва уларнинг малакасини ошириш, қишлоқ хўжалиги маҳсулотларини қайта ишлаш учун кичик технологиялар яратиш, тиббий клиникалар ташкил этиш, халқ ҳунармандчилиги соҳасида қўшма лойиҳаларни йўлга қўйиш каби долзарб масалаларга эътибор қаратилди.

Тадбир доирасида бўлиб ўтган “савол-жавоб” сессиясида Ҳиндистон компаниялари ЭИЗларда бизнесни рўйхатдан ўтказиш, IT-соҳасида интеллектуал мулкни ҳимоя қилиш ва ўзаро муносабатларнинг бошқа долзарб кун тартиби бўйича маълумот олди.

Давра суҳбати якунида унинг барча иштирокчилари мамлакатимиз пойтахтида бўлиб ўтадиган V Тошкент халқаро инвестиция форуми ва “ICT Week Uzbekistan 2026” ҳафталигига таклифномалар олди.