САМАРҚАНД, 19 январь. /“Дунё” АА/. Ўзбекистонга ташриф буюрган Ироқ бизнес-делегацияси Самарқанддаги “Ideal Elektro Lux”, “Sam Rafoat Tekstil”, “SAG”, “Azia Metall Prof” ва “Pet Agro Oil” корхоналари ишлаб чиқариш фаолияти билан яқиндан танишди, деб хабар қилмоқда “Дунё” АА мухбири.

Ироқ бизнес-делегациясининг Самарқандга ташрифи чоғида Ўзбекистон–Ироқ бизнес-форуми бўлиб ўтди.

Анжуманда озиқ-овқат ва қишлоқ хўжалиги маҳсулотлари, қурилиш моллари, фармацевтика маҳсулотлари, электротехника маиший уй жиҳозлари, текстиль ва тўқимачилик, мебель маҳсулотлари соҳаларида икки давлат ишбилармонлари қатнашди.

Тадбирда Ўзбекистон Савдо-саноат палатаси раиси Даврон Ваҳобов ва Ироқ Иқтисодий кенгаши раиси Иброҳим ал-Бағдодий нутқ сўзлади.

Форумда Самарқанднинг инвестициявий жозибадорлиги, саноат ва экспорт салоҳиятларига бағишланган тақдимот ўтказилди.

Икки давлат ишбилармон доира вакиллари ўртасида В2В учрашувлар ташкил этилиб, ўзаро ҳамкорликнинг истиқболли йўналишлари муҳокама қилинди.