САНКТ-ПЕТЕРБУРГ, 14 май. /"Дунё" АА/. Россиянинг "Санкт-Петербург" телеканалида Иккинчи жаҳон уруши даврида қаҳрамонлик кўрсатган Ўзбекистоннинг мард ўғлонлари ва ўзбек халқи ҳаётига бағишланган фильмлар намойиш этилди, деб хабар қилмоқда "Дунё" АА мухбири.

Ушбу лойиҳа Ўзбекистон Бош консулхонаси ташаббуси ва Санкт-Петербург ҳукумати кўмагида Иккинчи жаҳон урушида қозонилган Ғалабанинг 80 йиллиги муносабати билан амалга оширилди.

Хусусан, ўзбек халқининг Иккинчи жаҳон урушидаги жасорати ва фидойилиги батафсил ёритилган "Ўзбек қизи", "Қирқ биринчи йил олмалари" ва "Ленинградликлар менинг болаларим" фильмлари икки кун давомида "Санкт-Петербург" телеканалида эфирга узатилди.

"Ўзбек қизи" фильмида ўзбек қизи тимсолида ўзбек халқининг урушга тортилиш тарихи ёритилган. Мазкур фильм Ўзбекистонда 2023 йилнинг энг яхши киноси сифатида эътироф этилган.

"Қирқ биринчи йил олмалари" фильми кекса ўзбек колхозчиси ҳақидаги мутлақо реал воқеага асосланган картинадир. "Ленинградликлар – менинг болаларим" бадиий фильмида эса қамалда қолган ва ота-онасидан айрилган болаларнинг Марказий Осиёга эвакуация қилинишига бағишланган.

Мазкур фильмлар намойиши томошабинлар томонидан ижобий кутиб олинди. Улар мазкур фильмлар фашизм устидан қозонилган Ғалабага беқиёс қисса қўшган ва оғир уруш йилларида юз минглаб эвакуация қилинган инсонларни ўз бағрига олган ўзбекистонликларнинг хотирасини ёд этишга хизмат қилишини таъкидладилар.