ЛОНДОН, 30 сентябрь. /"Дунё" AA/.  Ўзбекистон элчиси Равшан Усманов Буюк Британиянинг "Dukes Education" ташкилоти директори Тим Фиш билан учрашув ўтказди, деб хабар қилмоқда "Дунё" АА мухбири.

"Dukes Education" раҳбари музокаралар аввалида Ўзбекистонда таълим соҳасида амалга оширалаётган ислоҳотлар эътироф этди. Шунингдек, у ташкилот фаолияти, жумладан компания ҳузуридаги мактаблар ва таълим муассасалари имкониятлари ҳақида батафсил маълумот берди.

Мулоқот якунида компания ва юртимизнинг мутасадди идоралари, қолаверса хусусий мактаблар билан ҳамкорлик алоқаларини йўлга қўйишга келишиб олинди.

"Dukes Education" 2015 йилда Британияда ташкил этилган бўлиб, у мамлакатдаги энг нуфузли хусусий таълим тармоқларидан бири ҳисобланади. Ташкилот мактаблар, коллежлар, боғчалар ва таълим марказларини қамраб олади. Хусусан, унинг таркибида 30 дан ортиқ таълим муассасалари мавжуд. "Cardiff Sixth Form College", "Oxford Sixth Form College", "Rochester Independent College", "Fine Arts College" шулар жумласидандир.

Компаниянинг Буюк Британия, Швейцария, Ирландия, Испания ҳамда Португалияда мактаблари мавжуд.