ТОШКЕНТ, 6 ноябрь. /"Дунё" АА/. Ўзбекистон ташқи ишлар вазири Бахтиёр Саидов кеча Вашингтонда бўлиб ўтган "C5+1" форматидаги ташқи сиёсат идоралари раҳбарларининг учрашувида иштирок этди, деб хабар бермоқда "Дунё" АА мухбири.

"Вашингтон шаҳрида ҳамкасбларимиз билан биргаликда "C5+1" платформасининг ўн йиллигини нишонладик, – деб ёзди Ўзбекистон ТИВ раҳбари ўзининг  telegram-каналида. – Самимий қабул учун АҚШ Давлат котиби Марко Рубио жанобларига чуқур миннатдорлик билдирамиз. Барчамиз Марказий Осиё ва АҚШ ўртасидаги ўзаро манфаатли ҳамкорликни ривожлантириш, савдо ва инвестиция алоқаларини кенгайтириш, ҳамда минтақавий барқарорлик ва доимий тараққиётни таъминлаш йўлида биргаликда ҳаракат қилмоқдамиз.

Ўзбекистон минтақамизда тинчлик, фаровонлик ва умумий ривожланиш йўлида конструктив мулоқот ва амалий ҳамкорликни давом эттириш борасидаги содиқлигини яна бир бор тасдиқлайди".