KECHKEMET, 5-fevral. /“Dunyo” AA/. O‘zbekiston elchisi Oybek Shaxavdinov Vengriyaning Kechkemet shahri meri Klaudiya Semereyne Pataki, Bach-Kishkun provinsiyasi meri o‘rinbosari, Savdo-sanoat palatasi raisi Yojef Gaal bilan uchrashuv o‘tkazdi, deb xabar bermoqda “Dunyo” AA muxbiri.

Muzokaralar chog‘ida tomonlar iqtisodiy aloqalarni mustahkamlash istiqbollarini, jumladan, savdo, sanoat ishlab chiqarishi va investitsiyalarni rivojlantirish imkoniyatlarini, madaniyat va turizm sohasidagi hamkorlikni muhokama qildi.

Sirdaryo viloyati va Bach-Kishkun viloyatlari o‘rtasidagi hamkorlik, shaharlar o‘rtasida birodarlik aloqalarini o‘rnatish va qo‘shma tadbirlarni tashkil etishga alohida eʼtibor qaratildi.

Uchrashuv yakunida ikki tomonlama munosabatlarni mustahkamlash hamda O‘zbekiston va Vengriya o‘rtasidagi iqtisodiy va madaniy hamkorlikni yanada rivojlantirishga kelishib olindi.