PEKIN, 14-may. /“Dunyo” AA/ AQSH prezidenti Donald Tramp Xitoyga tashrif buyurib, XXR raisi Si Szinpin bilan ikki kunlik muzokaralar o‘tkazadi, deb xabar bermoqda “Dunyo” AA muxbiri “CNN”ga tayanib.

Bu Donald Trampning 2017-yilda prezidentlik saylovlarida g‘alaba qozonganidan keyin Pekinga amalga oshirgan ilk tashrifidir. Dastlab safar mart oyiga rejalashtirilgan edi, biroq AQSH va Isroilning Eronga qarshi urushi boshlanganidan keyin u qoldirildi.

Bu galgi muzokaralarning asosiy mavzusi dunyoning ikki yirik iqtisodiyoti o‘rtasidagi iqtisodiy munosabatlar bo‘ladi. Xalqaro ekspertlar ushbu tashrifdan jiddiy natijalar kutmayotganini qayd etgan. Tashrifning asosiy natijasi yetakchilar uchrashuvi va barqaror muloqotni saqlab qolish bo‘lishi mumkinligini taʼkidlamoqda.

AQSH rahbarining tashrifi sharafiga faxriy qorovul saf tortdi. Donald Tramp va Si Szinpin Xalq yig‘inlari uyiga yo‘l olishdi, u yerda matbuot uchun dastlabki bayonotlarni berishdi va muzokaralarni boshlashdi.

“Biz bir-birimizni yaxshi tushunamiz. Qiyinchiliklar bo‘ldi, lekin biz ularni yengib o‘tdik. Kimdir buni bilmasligi mumkin, lekin agar bizda muammolar bo‘lsa, ularni juda tez hal qilardik. Men sizga qo‘ng‘iroq qildim, siz menga qo‘ng‘iroq qildingiz. Men hammaga siz ajoyib yetakchi ekaningizni aytaman”, – ­dedi AQSH prezidenti.

O‘z navbatida, Si Szinpin “Bizning uchrashuvimizni butun dunyo kuzatib bormoqda”, deya taʼkidladi. XXR raisining so‘zlariga ko‘ra, xalqaro vaziyat notinch bo‘lib qolmoqda va dunyodagi o‘zgarishlar so‘nggi yuz yillikdagi har qachongidan ham tezroq sodir bo‘lmoqda.

Shuningdek, Xitoy yetakchisi AQSH va Xitoy “Fukidid tuzog‘i” deb ataladigan anʼanaviy jahon yetakchisi va o‘sib kelayotgan yangi kuch o‘rtasidagi ziddiyatdan qochishga muvaffaq bo‘lishiga umid bildirdi.

Si Szinpin bilan uchrashuvdan oldin Donald Tramp Xitoydan Amerikaning eng yirik texnologik kompaniyalari uchun “iqtisodiyotni ochishni” so‘rash niyatida ekanini aytdi. U, shuningdek, Eron atrofidagi vaziyatni muhokama qilishni kutayotganini bildirdi, biroq Vashington mojaroni tugatish uchun Pekinning yordamiga muhtoj emasligini taʼkidladi.

Xitoy tomoni Tayvanga Amerika qurollarini yetkazib berishni to‘xtatish masalasini ko‘tarishi kutilmoqda. Bundan tashqari, Pekin o‘tgan yilning oktyabr oyidan beri AQSH bilan savdo urushida amal qilayotgan sulhni uzaytirishdan manfaatdor.

Amerika delegatsiyasi tarkibida prezidentning o‘g‘li Erik Tramp, shuningdek, Amerikaning eng yirik kompaniyalari rahbarlari, jumladan, “Nvidia” rahbari Jensen Xuang, “Tesla” va “SpaceX” rahbari Ilon Mask, “Apple” rahbari Tim Kuk va “BlackRock” direktori Larri Fink bor. Delegatsiyaga, shuningdek, “Meta”, “Visa”, “JP Morgan”, “Boeing” va “Cargill” vakillari hamrohlik qilmoqda.

AQSH va Xitoy o‘rtasidagi raqobatning asosiy sohalaridan biri bo‘lgan sunʼiy intellekt tizimlari uchun chiplar ishlab chiqaradigan “Nvidia” rahbarining ishtiroki alohida eʼtiborni tortdi.

Amerika tomonining maʼlumotlariga ko‘ra, 2025-yilda AQSHning Xitoy bilan savdo defitsiti qariyb 200 milliard dollarni tashkil etgan. Donald Tramp bu savdo defitsitini kamaytirishni kutmoqda, Xitoy esa sunʼiy intellekt sohasidagi mavqeini mustahkamlash va Amerika texnologiyalariga kirishni saqlab qolishga intilmoqda.

Tashrifning asosiy qismi 14-may kuni bo‘lib o‘tadi. Muzokaralardan so‘ng Xalq yig‘inlari uyida davlat ziyofati bo‘lib o‘tadi. 15-may kuni Donald Tramp Chjunnanxay hukumat majmuasiga tashrif buyuradi. U yerda Si Szinpin bilan yana bir uchrashuv va ish tushligi bo‘lib o‘tadi. Shundan so‘ng AQSH prezidenti Vashingtonga qaytadi.

“Reuters” agentligi surati