KARAKAS, 29-iyun. /“Dunyo” AA/. Venesueladagi vayronkor zilzila qurbonlari soni ortib bormoqda: so‘nggi maʼlumotlarga ko‘ra, kamida 1450 kishi halok bo‘lgan, deb xabar bermoqda “Dunyo” AA muxbiri “CNN”ga tayanib.

La-Gvayre va Karakas shaharlarida qidiruv-qutqaruv ishlari davom etmoqda. Tahlillarning yomonlashishiga qaramay, qutqaruvchilar omon qolganlarni topishga muvaffaq bo‘lishdi.

Venesuela prezidenti vazifasini bajaruvchi Delsi Rodrigesning aytishicha, dam olish kunlari vayronalar ostidan 33 kishi qutqarilgan. Qutqarilganlar orasida chaqaloq, vayronalar ostida uch kundan ortiq vaqt o‘tkazgan ayol, shuningdek, bir necha soatlik farq bilan qutqarilgan 11 yoshli ikki bola bor.

Shu bilan birga, o‘n minglab odamlar bedarak yo‘qolgan, yangi tirik qolganlarni topish umidi esa soat sayin kamayib bormoqda. Insonparvarlik tashkilotlari vakillari tabiiy ofatdan keyingi dastlabki 48–72 soat odamlarni qutqarish uchun eng muhim vaqt ekanini eslatib o‘tmoqda.

Delsi Rodriges voqeani Venesuela tarixidagi “Eng dahshatli tabiiy ofat” deb atadi va zararni baholash bo‘yicha komissiya tuzilishini eʼlon qildi. Uning so‘zlariga ko‘ra, xalqaro yordam va xorijiy qutqaruvchilarning kelishi favqulodda xizmatlar ishini kuchaytiradi va gumanitar oqibatlarni bartaraf etishga yordam beradi.

Eslatib o‘tamiz, chorshanba kuni 7,2 va 7,5 magnitudali ikkita zilzila 39 soniya oralig‘ida sodir bo‘lgan. Natijada, 800 ga yaqin bino qulab tushdi, odamlar vayronalar ostida qoldi.

Ko‘pgina jabrlangan hududlarda qarindoshlar vayronalarni mustaqil ravishda tozalashni davom ettirmoqda. Baʼzilar vayronalar ostida odamlarning ovozini eshitayotganini, biroq og‘ir beton plitalarni maxsus texnikadan foydalanmasdan siljitolmayotganini maʼlum qilgan.

“AP” agentligi surati