NOVOSIBIRSK, 12-noyabr. /“Dunyo” AA/. O‘zbekistonning Novosibirsk shahridagi Bosh konsulxonasi diplomatlari mushkul vaziyatda qolgan ona va voyaga yetmagan bolalarning vatanga qaytishini ta’minladi, deb xabar bermoqda “Dunyo” AA muxbiri.

Rossiya migratsiya qonunchiligini buzgani sababli Vaqtincha saqlash markaziga joylashtirilgan onaning voyaga yetmagan (2 dan 12 yoshgacha bo‘lgan) farzandlari Novosibirsk shahridagi Go‘daklar uyiga olib ketilgan. 

Bosh konsulxona diplomatlari bir kun ichida Markaz va Go‘daklar uyi rahbariyati bilan muzokaralar o‘tkazib, fuqaroni ozod qilishga erishdi hamda unga O‘zbekistonga qaytish uchun tezkorlik bilan hujjatlar rasmiylashtirdi.

Shuningdek, diplomatlar bolalarni “Tolmachyovo” xalqaro aeroportiga yetkazib berishni ta’minladilar, u yerda ular onasi bilan uchrashdilar.

Migratsiya agentligi vakolatxonasi ko‘magida oilaning barcha a’zolari uchun vatanga qaytish aviachiptalari xarid qilindi.