QOHIRA, 22-dekabr. /“Dunyo” AA/. O‘zbekiston Tog‘-kon sanoati va geologiya vazirligi, Navoiy kon-metallurgiya kombinati, Misrning “Endeavour Mining” kompaniyasi va xalqaro konsalting tashkiloti vakillari o‘rtasida qimmatli metallarni izlash sohasida hamkorlik masalalari bo‘yicha onlayn uchrashuv o‘tkazildi, deb xabar qilmoqda “Dunyo” AA muxbiri.

Elchixona tomonidan tashkil etilgan uchrashuvda qo‘shma geologiya-qidiruv ishlarini amalga oshirishning amaliy va investitsiyaga yo‘naltirilgan jihatlari muhokama etildi. Tomonlar uzoq muddatli hamkorlik va yangi foydali qazilma konlarini aniqlash uchun mustahkam asos sifatida o‘zaro manfaatli loyihalarga ustuvor ahamiyat berish bo‘yicha yakdil fikr bildirdi. Taʼkidlanishicha, bunday yondashuv ishonchlilik va barqaror surʼatni taʼminlash, hamkorlikni kengroq tijorat tashabbuslariga olib chiqishga xizmat qiladi.

Uchrashuvning muhim natijalaridan biri sifatida hamkor kompaniyalar, vazirlik va tegishli muvofiqlashtiruvchi tuzilmalar vakillari, tajribali geologiya-qidiruv mutaxassislarini qamrab olgan kichik, texnik yo‘naltirilgan ishchi guruhni tashkil etish bo‘yicha kelishuvga erishildi. Ushbu guruh dastlab texnik baholash va ustuvor yer maydonlarini aniqlashga eʼtibor qaratadi.