BISHKEK, 21-fevral. /“Dunyo” AA/. Qirg‘izistonlik taniqli siyosatshunos Bakit Baketayev “Dunyo” AA muxbiriga O‘zbekiston Prezidentining 17–19-fevral kunlari AQSHga qilgan amaliy tashrifi yuzasidan fikr bildirdi:

– 30 yildan ortiq vaqtdan buyon Markaziy Osiyodagi siyosiy jarayonlarni kuzatib kelaman. Shuni ayta olamanki, so‘nggi yillarda O‘zbekistonda amalga oshirilayotgan islohotlar mintaqadagi keng ko‘lamli va tizimli o‘zgarish sifatida ko‘rilmoqda.

O‘zbekiston yetakchisining 17–19-fevral kunlari Tinchlik kengashining birinchi majlisida ishtiroki nafaqat ikki tomonlama, balki global ahamiyatga ega voqeadir. O‘zbekiston 2026-yil yanvar oyida Davosda bo‘lib o‘tgan Jahon iqtisodiy forumida tashkil etilgan yangi xalqaro platforma taʼsischilari qatoriga kirganining o‘zi Toshkentning xalqaro maydondagi obro‘si oshganidan dalolat beradi.

Toshkentning Falastin masalasidagi pozitsiyasi har doim BMT rezolyutsiyalariga muvofiq adolatli yechimni qo‘llab-quvvatlashga asoslangan va endi bu pozitsiya qo‘shimcha xalqaro platformaga ega bo‘lmoqda.

O‘zbekiston–AQSH muloqoti faollashganini alohida qayd etish zarur. Keyingi oylarda oliy darajadagi muloqotlar – BMT Bosh Assambleyasi sessiyasida ishtirok etishdan tortib, Qo‘shma Shtatlarda ishchi muzokaralar o‘tkazish va iqtisodiy hamkorlikni, shu jumladan, “С5+1” formatida kengaytirishgacha sezilarli darajada faollashdi. Bu munosabatlar sifat jihatidan yangi strategik sheriklik darajasiga ko‘tarilganidan dalolat beradi.

Qo‘shni davlat vakili sifatida O‘zbekistondagi jarayonlarni katta qiziqish bilan kuzataman. Biz, Markaziy Osiyoning qardosh xalqlari islohotlar, institutsional qurilish va tinchlik diplomatiyasini mustahkamlash masalalarida bir-birimizdan o‘rganishimiz kerak. Bir davlatning muvaffaqiyatlari butun mintaqaning barqarorligini mustahkamlaydi.

O‘zbekiston Prezidenti Shavkat Mirziyoyevning isteʼdodi va siyosiy uzoqni ko‘ra bilishi, Qirg‘iziston Prezidenti Sadir Japarovning so‘zlariga ko‘ra, Qirg‘iziston va Tojikiston o‘rtasida yetilib kelayotgan harbiy mojaroni tinchlantirishda muhim rol o‘ynadi, shuningdek, Tinchlik kengashi faoliyatida muhim rol o‘ynashi mumkin.

Markaziy Osiyo jahon siyosatining chekkasidan masʼuliyatli sheriklik makoniga aylanib bormoqda. Toshkentning bu jarayondagi hissasi ham eʼtirofga loyiq.