BUDAPESHT, 27-may. /"Dunyo" AA/. O'zbekiston elchisi Oybek Shaxavdinov Vengriya amaliy san'at muzeyi kolleksiyasi direktori Jombor Yekey bilan uchrashdi, deb xabar qilmoqda "Dunyo" AA muxbiri.

Muzokaralar chog'ida Vengriya muzeyida O'zbekiston madaniyatini targ'ib qilish, shuningdek, O'zbekiston amaliy san'at muzeyi va Vengriya amaliy san'at muzeyi o'rtasida hamkorlikni yo'lga qo'yish masalalari muhokama qilindi.

Ikki mamlakat o'rtasidagi madaniy aloqalarni mustahkamlash doirasida Vengriya amaliy san'at muzeyida o'zbek amaliy san'atining boy merosiga bag'ishlangan ko'rgazma tashkil etish bo'yicha kelishuvga erishildi.

Ko'rgazmada O'zbekiston hududlaridan sopol buyumlar, hunarmandchilik mahsulotlari va milliy liboslar namoyish etiladi.

Ushbu tadbir Vengriya aholisi va mehmonlariga O'zbekistonning boy madaniy merosi va tarixi bilan yaqindan tanishish uchun noyob imkoniyat yaratadi. Qayd etilishicha, bo'lajak ko'rgazma nafaqat o'zbek hunarmandlarining yuksak mahoratining namoyishi, balki mamlakatlarimiz o'rtasidagi madaniy almashinuv va hamkorlikni yanada chuqurlashtirish yo'lidagi muhim qadam bo'ladi.

Tomonlar, shuningdek, Toshkent va Budapeshtda bir qator qo'shma madaniy tadbirlarni tashkil etish va ularni yuqori saviyada o'tkazish bo'yicha ham kelishib oldilar.