BERLIN, 29-yanvar. /“Dunyo” AA/. Yurtimizning “O‘zto‘qimachiliksanoat” hamda Germaniyaning “Gesamtmasche” uyushmalari vakillari ishtirokida uchrashuv bo‘lib o‘tdi, deb xabar bermoqda “Dunyo” AA muxbiri.

Uchrashuvda o‘tgan 2023–2025-yillarda hamkorlikda amalga oshirilgan “GUZ Partners” loyihasi doirasida erishilgan natijalar sarhisob qilinib, loyihaning navbatdagi bosqichida belgilangan vazifalarni amalga oshirish masalalari muhokama etildi.

“Gesamtverband der deutschen Maschenindustrie e.V. – Gesamtmasche” – Germaniyaning trikotaj mahsulotlari sanoati uyushmasi hisoblanadi. Ushbu tashkilotga taxminan 250 ta kompaniya aʼzo, 20 ming 500 ga yaqin ish o‘rniga ega va yillik aylanmasi 4,5 milliard yevro atrofida. 1916-yil tashkil etilgan uyushmaning eksportdagi ulushi 45 foiz, qarorgohi Shtutgart shahrida joylashgan. Xalqaro bozorlar, texnika va innovatsiyalar, barqarorlik va atrof-muhit uyushmaning asosiy yo‘nalishlari hisoblanadi.

“GUZ Partners” loyihasi doirasida o‘tgan yillar mobaynida 25 ta o‘quv seminari va sohaga ixtisoslashtirilgan 8 ta tadbir tashkil etildi. Natijada, 2 ming nafardan ortiq soha vakillarining kasbiy bilim va ko‘nikmalari mustahkamlandi.

Nemis kompaniyalarining O‘zbekistonga hamda yurtimiz to‘qimachilik sanoati korxonalarining Germaniyaga biznes-missiyalari yaxshi yo‘lga qo‘yilgan.

Uchrashuv davomida Germaniyalik hamkorlarga mamlakatimiz to‘qimachilik sanoatining eksport imkoniyatlari, mahsulot turlari, ishlab chiqarish quvvatlari, korxonalarning xalqaro standartlar bo‘yicha sertifikatlash tajribasi haqida maʼlumot berildi.