ТАШКEНТ, 25 июнь. / "Дунё" АА/. АҚШнинг Ўзбекистондаги дипломатик миссияси раҳбари ўринбосари Хезер Бернс "Дунё" АА учун интервьюсида 24-25 июнь кунлари Тошкентда бўлиб ўтган "MINEX Central Asia 2025" форумининг аҳамияти ҳақидаги фикрларини билдирди:

– Ўзбекистон Америка компаниялари эътиборини тобора кўпроқ ўзига тортмоқда. Биз Америка Қўшма Штатлари ҳукумати билан биргаликда Ўзбекистон технологик металлар комбинати (ТМК) каби ташкилотлар ўртасида ҳамкорликни чуқурлаштиришга ҳаракат қилаяпмиз. Яқинда ТМК билан биргаликда АҚШ компаниялари учун муҳим минераллар бўйича вебинар ўтказдик. Биз Юта штатидан тоғ-кон корхоналари вакилларидан иборат делегациянинг Олмалиққа сафарини ташкил этдик. АҚШ вакиллари маҳаллий мис ишлаб чиқариш билан танишдилар ва бу уларда кучли таассурот қолдирди.

Бундан ташқари, биз Ўзбекистон ҳукумати билан ҳам ҳамкорлик қиламиз. Сўнгги бир неча йил ичида муносабатларимиз янада мустаҳкамланди. Айниқса муҳим минераллар соҳасида. Ўтган йили сентябрь ойида биз мамлакатингиз ҳукумати билан ушбу соҳада ўзаро англашув меморандумини имзоладик. Шунингдек, Ўзбекистон делегациянинг ҳар тўрт йилда бир марта АҚШда ўтказиладиган энг йирик тоғ-кон саноати тадбири — "MINExpo International" кўргазмасига сафарини уюштирдик. Шу тариқа, муносабатларимиз фаол ривожланишда давом этмоқда.

 Таъкидлаш жоизки, Ўзбекистон улкан салоҳиятга эга мамлакат. Бу ерда аксарият энг бой фойдали қазилма конлари жойлашган. Шу ўринда Ўзбекистон Президенти томонидан амалга оширилаётган иқтисодий ислоҳотларнинг аҳамиятини ҳам эътироф этмасликнинг иложи йўқ. Улар мамлакатни халқаро инвесторлар учун тобора жозибадор қиляпти. Масалан, 2024 йилда "Ер ости бойликлари тўғрисида"ги Ўзбекистон

Республикаси Қонуни қабул қилинди. Биз Европа тикланиш ва тараққиёт банкининг мамлакатингиз ҳукумати билан ушбу қонунни амалга ошириш учун янги лицензиялаш тартиб-қоидалари ва норматив ҳужжатларни ишлаб чиқиш бўйича ҳамкорлик қилаётганини мамнуният билан кузатяпмиз. Бу, шубҳасиз, Ўзбекистонга янги инвесторларни жалб қилишга ҳисса қўшади.

Ишончим комилки, бу йўналишда халқаро ҳамкорлик жуда муҳим. Шунингдек, муҳим минералларнинг ишончли таъминот занжири АҚШ учун алоҳида устуворлик касб этади. Ва биламизки, бу соҳа Ўзбекистон Президенти ҳамда ҳукумати учун ҳам стратегик аҳамиятга эга. Ўйлайманки, бизда биргаликда ишлаш учун ноёб имконият бор. Конлардан ташқари, Ўзбекистон яна бир муҳим ресурсга эга — бу одамлар. Аҳолининг қариши ва ишчи кучининг қисқариши муаммосига дуч келаётган кўплаб мамлакатлардан фарқли ўлароқ, Ўзбекистон Марказий Осиёдаги энг йирик бозор ва энг кўп ишчи кучига эга. Айнан мана шу икки омил мамлакатингизни айниқса жозибадор қилади.

Мен бу ерга ўтган йилнинг август ойида Жонатан Хеник раҳбарлигида элчи ўринбосари сифатида келганман. Бироқ, бу менинг Ўзбекистонга биринчи ташрифим эмас эди. Мен бу ерга биринчи марта 2021 йил декабрь ойида АҚШ Давлат котибининг Жанубий ва Марказий Осиё ишлари бўйича ёрдамчиси Дональд Лу билан икки томонлама стратегик мулоқот доирасида бўлганман. Кейинроқ Савдо вазири ўринбосари Мариса Лаго билан келдим. 2023 йил июнь ойида эса мен АҚШ компаниялари иштирокида мамлакатингизга савдо миссиясини ташкил қилдим. Бир сўз билан айтганда, мен бу бозорнинг ривожланишини бир неча йилдан буён кузатиб келяпман.

Бошиданоқ Ўзбекистондаги имкониятлар мени ҳайратда қолдирган. Ҳар бир сафаримда сезиларли даражадаги тараққиётга гувоҳ бўлдими. Сўнгги йилларда мамлакатингизда янги АҚШ компанияларининг сони изчил кўпайиб бораётганига гувоҳ бўлаяпмиз.

АҚШ ишбилармон доиралари вакилларининг қизиқиши Ўзбекистонга тобора ортиб бораётганини ҳисобга олсак, биз уларни қўллаб-қувватлаш учун кучайтирилган режимда ишлашимиз керак. Бу эса жуда ҳам масъулиятли вазифа.