ВАШИНГТОН, 6 июль. /“Дунё” АА/. АҚШ президенти Дональд Трамп Анқарада бўлиб ўтадиган НАТО саммитида қатнашиб, Украина етакчиси Владимир Зеленский ва Суриянинг муваққат раҳбари Аҳмад аш-Шараа билан икки томонлама учрашувлар ўтказади, деб хабар бермоқда “Дунё” АА мухбири “Anadolu” агентлигига таяниб.

Оқ уй матбуот котиби ўринбосари Анна Келли ва АҚШнинг НАТОдаги доимий вакили Метт Уитакернинг қўшма брифингда маълум қилишича, музокаралардан сўнг Америка президенти матбуот анжумани ўтказиб, Туркияга ташрифига якун ясайди.

Музокараларнинг асосий мавзуси Украинадаги можарога барҳам беришга қаратилган дипломатик саъй-ҳаракатлар бўлади. АҚШ маъмурияти вакилларига кўра, жанговар ҳаракатларнинг давом этиши ҳар икки томон учун оғир талафот ва вайронагарчиликларга олиб келмоқда. Бу эса музокаралар жараёнини фаоллаштириш заруратини кучайтиради.

Томонлар можародан чиқишнинг эҳтимолий сиёсий ва дипломатик механизмларини, фронт чизиғидаги вазиятнинг умумий динамикасини муҳокама қилиши кутилмоқда. Давом этаётган уруш шароитида халқаро хавфсизлик кафолатлари ва бўлажак музокаралар форматлари масаласи Киев ҳамда Вашингтон ўртасидаги мулоқотнинг марказий унсурларидан бири бўлиб қолмоқда.

Саммитга тайёргарлик фонида Россия президенти Владимир Путин ва Дональд Трамп ўртасида телефон орқали мулоқот бўлиб ўтди. Кремль маълумотларига кўра, суҳбат қарийб 1,5 соат давом этган. Унда Украина атрофидаги вазият ҳамда Туркияда бўлиб ўтадиган халқаро учрашувлар муҳокама қилинган.

Россия президенти ёрдамчиси Юрий Ушаковнинг сўзларига кўра, Владимир Путин Дональд Трампни АҚШ мустақиллигининг 250 йиллиги билан табриклаган. Суҳбат давомида можароларни ҳал этиш истиқболлари муҳокама қилинган. Америка етакчиси жанговар ҳаракатларни тезроқ тўхтатиш учун ечимлар топишга кўмаклашишга тайёрлигини билдирган.

Россия томони Москванинг ўз ёндашувларини ҳисобга олган ҳолда, масалани сиёсий-дипломатик йўл билан ҳал қилиш зарурлигига эътибор қаратган. Шунингдек, ҳарбий-сиёсий ва иқтисодий масалаларда доимий алоқаларни сақлаб қолиш муҳимлиги қайд этилди.

Хабар қилинишича, АҚШ президентининг махсус элчилари Стив Уиткофф ва Жаред Кушнер воситачилик саъй-ҳаракатларини давом эттиради ва зарурат туғилса, Москвага ташриф буюришга тайёр. Аввалроқ, Кремль узоқ танаффусдан сўнг Қўшма Штатларнинг воситачилик ҳаракатлари қайта тикланишига умид билдирган эди.

Айни шу куни Дональд Трамп ва Владимир Зеленский ўртасида алоҳида телефон мулоқоти бўлиб ўтди. Суҳбат чоғида фронт чизиғидаги вазият ҳамда можарони ҳал қилиш йўлларини излашга қаратилган дипломатик саъй-ҳаракатлар муҳокама қилинди.

Украина етакчиси ўз баёнотларида мавжуд вазият ва музокараларнинг эҳтимолий форматлари билан боғлиқ халқаро ташаббуслар муҳокама қилинганини қайд этди.

НАТОнинг Анқарадаги саммити 7­–8 июль кунлари глобал халқаро кун тартиби фонида бўлиб ўтади. Оқ уй вакилларига кўра, АҚШ бир вақтнинг ўзида можарога барҳам бериш бўйича дипломатик саъй-ҳаракатларни кучайтиришга ва иттифоқчилар билан ҳамкорликни сақлашга интилмоқда. Айни пайтда альянс ичида мудофаа мажбуриятларини тақсимлаш ва Европа хавфсизлигига оид кейинги стратегия юзасидан муҳокамалар давом этмоқда.