ИСЛОМОБОД, 15 апрель. /“Дунё” АА/. АҚШ президенти Дональд Трамп Покистонда Яқин Шарқдаги урушни тўхтатиш бўйича музокаралар яқин икки кун ичида қайта бошланиши мумкинлигини маълум қилди, деб хабар бермоқда “Дунё” АА мухбири “Fox News” телеканалига таяниб.

“Яқин икки кун ичида нимадир содир бўлиши мумкин ва биз у ерга боришга кўпроқ моилмиз”, – ­деган Оқ уй раҳбари тафсилотларни очиқламасдан.

Музокараларда Америка томонидан аввалги жамоа – АҚШ вице-президенти Жей Ди Венс, президентнинг махсус вакиллари Стив Уиткофф ва Жаред Кушнер иштирок этиши кутилмоқда.

Қайд этилишича, Покистон, Эрон ва Кўрфаз давлатлари расмийлари ҳам АҚШ ва Эрон музокара гуруҳлари шу ҳафта Покистонга қайтиши мумкинлигини маълум қилган, бироқ сана ҳали белгиланмаган.

Кейинроқ Покистондаги биринчи музокараларда қатнашган вице-президент Жей Ди Венс президент Эрон билан “муҳим келишув” тузмоқчи бўлганини, бироқ икки давлат ўртасида катта ишончсизлик борлигини айтди.

“Сиз бу муаммони бир кечада ҳал қила олмайсиз”, – деди вице-президент.

Эслатиб ўтамиз, ўтган дам олиш кунлари Исломободда бўлиб ўтган музокаралар келишувга олиб келмади. Бу эса икки ҳафталик ўт очишни тўхтатиш режимининг сақланиб қолишига шубҳа уйғотди.

Муваффақиятсизлик Вашингтонни Эрон портларини блокада қилишга ундади. АҚШ Марказий қўмондонлиги дастлабки 24 соат ичида ҳеч бир кема Эрон портлари блокадасини ёриб ўта олмаганини маълум қилди. Бироқ, кемачилик маълумотлари шуни кўрсатдики, 14 апрель куни камида саккизта кема сув йўлини кесиб ўтганида, блокада Ҳормуз бўғози орқали ҳаракатланишга кам таъсир кўрсатган.

Айни пайтда Исроил ва Ливан вакиллари Вашингтонда 1993 йилдан бери биринчи марта учрашув ўтказди. АҚШ Давлат департаменти маълум қилишича, томонлар тинч йўл билан ҳал қилиш мавзусида тўғридан-тўғри музокараларни бошлаш йўлида қадамлар ташлади. Аввалроқ, Эрон томони урушни тўхтатиш тўғрисидаги келишув Ливанни ҳам ўз ичига олишини талаб қилган эди. Чунки Исроил ҳарбийлари Ливаннинг “Ҳизбуллоҳ” гуруҳи билан қуролли тўқнашувни олиб бормоқда ва мамлакат жанубида қуруқликдаги ҳужумни давом эттирмоқда.

“AFP” агентлиги сурати