БУДАПЕШТ, 13 апрель. /“Дунё” АА/. Петер Мадьяр бошчилигидаги мухолифатчи “Тиса” партияси Венгриядаги парламент сайловларида ғалаба қозонди, деб хабар бермоқда “Дунё” АА мухбири Миллий сайлов бюросининг сўнгги маълумотларига таяниб.

Маълумотларга кўра, “Тиса” парламентда 138 ўрин, амалдаги бош вазир Виктор Орбаннинг “Фидес” партияси ва у билан иттифоқдош Христиан-демократик халқ партияси (KDNP) 55 ўрин олган. “Mi Hazank” (“Бизнинг Ватан”) ўта ўнг ҳаракати эса 6 та ўрин олишга эришган.

Шундай қилиб, “Тиса” ҳозирда парламентдаги ўринларнинг учдан икки қисмидан кўпроғини, яъни конституциявий кўпчиликни қўлга киритмоқда. Партия раҳбари Петер Мадьярнинг айтишича, Виктор Орбан уни рекорд даражадаги сайловдаги ғалабаси билан табриклаган.

45 ёшли Петер Мадьярнинг сўзларига кўра, у коррупцияга қарши қаттиқ кураш олиб бориш, “тизимли ўзгаришлар” ўтказиш, шунингдек, янги конституцияни тақдим этиш ниятида. Бундан ташқари, сиёсатчи Венгриянинг Россиядан узоқлашиши ва Европа Иттифоқига аъзо мамлакатнинг НАТОнинг ишончли иттифоқчиси сифатида қайтиши тарафдори.

Бош вазир Виктор Орбаннинг ўзи Венгрия пойтахтида ўз партияси тарафдорлари олдида нутқ сўзлади. У ўз партияси учун сайловнинг дастлабки натижаларини “аниқ” ва “оғриқли” деб атади.

“Ғолиб партияни табрикладим. Биз мухолифатда ҳам венгер халқи ва ватанимизга хизмат қиламиз”, – деди 2010 йилдан бери ҳокимият тепасида турган амалдаги бош вазир.

Эслатиб ўтамиз, АҚШ маъмурияти сайловолди кампаниясининг сўнгги босқичида ҳам Виктор Орбанни қўллаб-қувватлаган эди. Сайловдан олдин АҚШ вице-президенти Жей Ди Венс Будапештга келди. Президент Дональд Трампнинг ўзи эса, агар бош вазир Виктор Орбан ва венгер халқига керак бўлса, Венгрияни иқтисодий қўллаб-қувватлашга ваъда берган эди.

Венгриядаги сайлов натижалари маълум бўлгач, бир қатор Европа етакчилари баёнот берди. Еврокомиссия раҳбари Урсула фон дер Ляйен Х да “Венгрия Европани танлаганини” таъкидлаган.

“Европа доим Венгрияни танлаган. Биргаликда кучлироқмиз. Мамлакат Европа йўлига қайтмоқда. Иттифоқ кучайиб бормоқда”, – деб ёзган у.

Петер Мадьярнинг “Facebook”даги саҳифасидан олинган сурат