ВЕНЕЦИЯ, 23 июль. /“Дунё” АА/. Венеция биенналеси Россия павильони 2026 йилги кўргазма дастурига қайтарилганидан сўнг Европа Иттифоқининг 2 миллион евро миқдоридаги грантни қайтариб олиш ҳақидаги қарори устидан шикоят қимоқчи, деб хабар бермоқда “Дунё” АА мухбири “Reuters” агентлигига таяниб.

Ташкилотчилар Европанинг Таълим ва маданият бўйича ижроия агентлиги (EACEA) қарори олдиндан кутилганини таъкидлаб, “ўз ҳуқуқларини барча ваколатли инстанцияларда ҳимоя қилишларини” маълум қилди.

Дунёдаги энг йирик маданий майдонлардан бири атрофидаги низо марть ойида ташкилотчилар Россиянинг 2022 йилдан бери илк бор биенналега қайтишини эълон қилганидан сўнг бошланди. Шундан сўнг Европа Комиссияси, агар Россия павильони қайта очилса, 2 миллион евро миқдоридаги молиялаштиришни тўхтатиб қўйиши ёки бекор қилиши мумкинлиги ҳақида огоҳлантирган эди.

Европа Комиссиясининг расмий вакили Том Реньенинг сўзларига кўра, европалик солиқ тўловчилар ҳисобидан молиялаштириладиган тадбирлар “демократик қадриятларни ҳимоя қилиши ҳамда мулоқот, хилма-хиллик ва сўз эркинлигини илгари суриши керак”. Брюссель фикрича, бу тамойилларга замонавий Россияда риоя қилинмаяпти.

Ўз навбатида, биеннале раҳбарияти ушбу грант кинематография бўлими лойиҳалари учун мўлжалланганини ва “Россиянинг иштирокига ҳеч қандай алоқаси йўқлигини” билдирди. Ташкилотчилар, шунингдек, молиялаштиришнинг йўқотилиши бюджетга ва режалаштирилган тадбирларни ўтказишга сезиларли таъсир кўрсатмаслигини қайд этдилар.

Биеннале Жамғармаси президенти Пьетранджело Буттафуоко аввалроқ фестиваль цензурасиз, “ Бутун дунё учун ҳамжиҳатлик майдони” бўлиб қолиши кераклигини таъкидлаган эди.

Эслатиб ўтамиз, 2026 йилги Венеция биенналесида Ўзбекистон ҳам бошқа иштирокчи мамлакатлар қаторида алоҳида кўргазма лойиҳасига эга миллий павильони билан иштирок этмоқда.