ТОШКЕНТ, 11 декабрь. /«Дунё» АА/. Ташриф билан Доҳада бўлиб турган Ўзбекистон ташқи ишлар вазири Бахтиёр Саидов Қатар Бош вазири ва ташқи ишлар вазири Муҳаммад бин Абдулраҳмон бин Жасим Ол Соний билан учрашди, деб хабар бермоқда «Дунё» АА мухбири.

«Қатар Бош вазири ва ташқи ишлар вазири Муҳаммад бин Абдулраҳмон бин Жасим Ол Соний Жаноби Олийлари билан учрашишдан беҳад мамнунмиз, - деб ёзди Ўзбекистон ТИВ раҳбари ўзининг telegram каналида. -Икки давлат раҳбарлари Ўзбекистон Республикаси Президенти Шавкат Мирзиёев Жаноби Олийлари ва Қатар Давлати Амири Шайх Тамим бин Ҳамад Ол Соний Ҳазрати Олийлари томонидан эришилган истиқболли келишувларни ҳаётга татбиқ этиш, савдо-иқтисодий ҳамкорликни кенгайтириш, маданий дипломатияни мустаҳкамлашга эътибор қаратдик. Икки томонлама ҳамкорлигимиз мисли кўрилмаган даражада жадал ривожланмоқда.

Эслатиб ўтамиз, Қатар Амири Тамим бин Ҳамад Ол Соний шу йилнинг 5-6 июнь кунлари давлат ташрифи билан Ўзбекистонга келди. Ўз навбатида, Ўзбекистон Президенти Шавкат Мирзиёев жорий йилнинг 1-2 октябрь кунлари давлат ташриф билан Қатарда бўлди.