ОСТОНА, 27 апрель. /"Дунё" АА/. Қозоғистоннинг "Казинформ" халқаро ахборот агентлиги "Ўзбекистонда ёмғир сунъий технологиядан фойдаланган ҳолда ёғдирилади" сарлавҳали мақола эълон қилинди, деб хабар бермоқда "Дунё" АА мухбири.

Унда Навоий вилоятининг Конимех туманида Ўзбекистонда илк маротаба ёмғир ёғдириш технологияси қўлланилаётгани қайд этилган.

Маълум қилинишича, туман ҳокимлиги ташаббуси билан булут ҳосил бўлиши ва ёғингарчиликни рағбатлантириш мақсадида атмосфера жараёнларига таъсир кўрсатадиган махсус техникалар келтирилган.

Бу технология қурғоқчил иқлими бўлган қатор мамлакатларда қўлланилсада, Ўзбекистон учун биринчи лойиҳа саналади.

"Ушбу инновацион лойиҳа Қозоғистоннинг "International centre of climate change technologies" компанияси билан ҳамкорликда амалга оширилмоқда. Яйловларда ёмғир ёғдириш инновациясини қўллаш орқали Конимехнинг чўл ҳудудларида чорвачиликни ривожлантириш мақсад қилинган. Мазкур технология туманда қурғоқчиликка қарши курашишда кенг қўлланилади, – дейилган мақолада.