БЕРЛИН, 18 июнь. /"Дунё" АА/. Германиянинг "Der Spiegel", "Bild", "Frankfurter Allgemeine Zeitung", "Die Welt", "Deutschlandfunk" радиоси, "ZDF" телеканали, "kicker" ва бошқа етакчи оммавий ахборот воситаларида футбол бўйича Ўзбекистон миллий терма жамоасининг ўз тарихида илк маротаба Жаҳон чемпионатига йўлланма олгани ҳақидаги туркум мақолалар эълон қилинди, деб хабар бермоқда "Дунё" АА мухбири.

Немис нашрлари Ўзбекистон миллий терма жамоаси 2026 йилги футбол бўйича Жаҳон чемпионатига илк бор йўлланма олишга муваффақ бўлганини, мазкур тарихий ютуқ нафақат Ўзбекистонда, балки халқаро миқёсда, хусусан, Германияда ҳам юқори баҳоланганини ёзган.

Жумладан, "Bild" газетаси "Тарих ёзилди!", "kicker" спорт журнали "Тарихий воқеа: Ўзбекистон... илк маротаба Жаҳон чемпионатида", нуфузли "FAZ" "Жаҳон чемпионатида дебютантлар: Унда Ўзбекистон ва Иордания иштирок этади" сарлавҳали мақолаларни муштарийлар эътиборига тақдим қилди.

Немис ОАВ қайд этганидек, Ўзбекистон терма жамоаси ўз тарихида улкан бурилиш ясади. Ўзбекистон биринчи марта футбол бўйича Жаҳон чемпионатига йўлланма олди. БАА билан кечган баҳсда 0:0 ҳисобидаги ғалабага тенг дуранг қайд этилди.

"Президент Шавкат Мирзиёев терма жамоа аъзоларига йўллаган табригида ушбу ютуқ миллий спорт солномасига олтин ҳарфлар билан битиладиган ёрқин натижа, деб атади. Ўзбекистон миллий терма жамоасининг ҳар тўрт йилликнинг йирик турнирида иштирок этиш ҳуқуқини қўлга киритгани бутун мамлакатда катта хурсандчилик билан кутиб олинди", – дейилган материалларда. 

Германия ОАВ Ўзбекистон миллий терма жамоаси таркибида Европанинг нуфузли клубларида тўп сураётган истеъдодли футболчилар борлигига урғу берган. Хусусан, Англиянинг "Manchster City" футболчиси Абдуқодир Ҳусанов ва Италиянинг "Рома" ҳужумчиси Элдор Шомуродов фаолиятига эътибор қаратилган.

"Der Spiegel" тарқатган материалда, Ўзбекистон терма жамоаси Эронга қарши ўйинда ҳам икки бор ҳисобда олдинга чиқиб, кучли рақибни қийин вазиятга қолдиргани – бу жамоа ўйинчиларининг даражаси жуда юқори эканлиги ва келгусида улар ҳар қандай жамоага муносиб рақобат кўрсата олишлари урғуланган.

"kicker" нашри мамлакат футбол тарихига назар ташлаб, Ўзбекистон 1994 йилда FIFAга аъзо бўлгандан кейин 31 йиллик узоқ йўлни босиб ўтганини қайд этади.

Шунингдек, мақолаларда, Ўзбекистон терма жамоаси тарихан фаворит бўлиб келмасада кучли рақибларга қарши ҳар доим муносиб ўйин кўрсатгани таъкидланган. Саралаш ўйинлардаги муваффақиятни бевосита чемпионат иштирокчилари сони кенгайганининг натижаси сифатида талқин қилмаслик, ҳолбуки, мамлакат саралаш гуруҳидан иккинчи ўрин билан чиққани эътироф этилган.

 "Бу, шубҳасиз, Ўзбекистон футболи тарихида катта маррадир, – деб ёзади "kicker" нашри дастлабки йўлланманинг аҳамиятини урғулаб.

Германия ОАВ, шунингдек, Ўзбекистонда ушбу спорт турига давлат сиёсати даражасида эътибор қаратилаётганини ва бу оламшумул ютуқ футболга киритилаётган инвестицияларнинг самараси эканини таъкидлаган.