ҚОҲИРА, 23 май. /"Дунё" АА/. Мисрнинг етакчи оммавий ахборот воситалари Ўзбекистон Президенти Шавкат Мирзиёевнинг 19-22 май кунлари Венгрия ва Словенияга бўлиб ўтаётган расмий ташрифини кенг ёритмоқда, деб хабар қиляпти "Дунё" АА мухбири.

Жумладан, ушбу мамлакатнинг "Сада ал-Балад" ахборот агентлиги "Ўзбекистон ва Венгрия: стратегик шерикликнинг янги даври" сарлавҳали мақолани тарқатди. Унда Ўзбекистон Президенти Шавкат Мирзиёев 19-21 май кунлари расмий ташриф билан Венгрияда бўлиши ҳамда ташриф давомида Туркий давлатлар ташкилотининг Будапешт шаҳрида бўлиб ўтадиган норасмий саммитида иштирок этиши маълум қилинган.

"Ўзбекистон ва Венгрия ўртасида дипломатик муносабатлар мамлакатимиз истиқлолга эришганидан кўп ўтмай, яъни 1992 йил 14 мартда ўрнатилган. Ўшандан бери икки томонлама муносабатлар расмий ўзаро ҳамкорликдан конструктив ва ўзаро ҳурматга асосланган мулоқотни йўлга қўйишгача бўлган муҳим эволюцияни бошидан кечирди. 2021 йил март ойида Венгрия Бош вазири Виктор Орбаннинг Тошкентга буюрган ташрифи якунлари бўйича Стратегик шериклик тўғрисидаги қўшма декларация имзоланди ва у замонавий жадал ҳамкорлик учун мустаҳкам пойдевор яратди. Ушбу ҳужжатда томонларнинг муносабатларни сифат жиҳатидан янги босқичга олиб чиқиш ниятлари қайд этилган", –деб ёзилган мақолада.

Мисрнинг "Ал-Дипломаси" ахборот агентлиги эса "Ўзбекистон-Словения: 30 йиллик шериклик ва ҳамкорликнинг янги уфқлари" сарлавҳали мақолани араб ва инглиз тилларида ўз ўқувчилари эътиборга тақдим қилди. "Ўзбекистон Президенти Шавкат Мирзиёев 21-22 май кунлари расмий ташриф билан Словенияда бўлади, – маълум қилган ахборот агентлиги. – Ушбу ташриф Ўзбекистон-Словения дипломатик муносабатлари ўрнатилганининг 30 йиллиги нишонланадиган йилда амалга ошиши рамзий маънога эга. 1995 йил 16 январдан бошлаб икки томонлама ҳамкорлик барқарор динамикани намоён этиб, сиёсий, иқтисодий ва маданий-гуманитар соҳаларни қамраб олган ҳолда изчил ривожланиб бормоқда.

"Экспертларнинг фикрича, Ўзбекистон ва Словения ўртасидаги сиёсий ҳамкорлик ўзаро ҳурмат ва конструктив мулоқот руҳида янада ривожлантириш ва чуқурлаштириш учун салмоқли салоҳиятга эга", –дейилган нашрда.

Миср ОАВ таъкидига кўра, дипломатик муносабатлар ўрнатилганининг 30 йиллиги нишонланадиган йилда Ўзбекистон ва Словения ўзаро ҳурмат ҳамда умумий манфаатларга асосланган ҳамкорликни янада мустаҳкамлаш истагини намоён этмоқда.

"Шу нуқтаи назардан, Ўзбекистон Президентининг Словенияга бўлажак ташрифининг тиғиз кун тартиби, олий даражадаги режалаштирилган учрашув ва музокаралар икки томонлама муносабатларнинг янги уфқларини очиб, уларга жадал тус бериши, шубҳасиз", – деб ёзилган "Ал-Дипломаси" АА мақоласида.