МОСКВА, 31 октябрь. /“Дунё” АА/. Россия Фанлар академияси Шарқшунослик институти илмий ходими, Жамоатчилик дипломатияси ва жаҳон сиёсатини таҳлил қилиш маркази директори Александр Воробьёв “Дунё” ААга Ўзбекистон Президентининг Туркияга амалий ташрифи ҳамда Анқара шаҳрида бўлиб ўтган Туркий давлатлар ташкилоти (ТДТ) саммитидаги иштироки юзасидан ўз фикр-мулоҳазаларини билдирди.

– Ўзбекистон Президентининг Анқарага ташрифи муҳим воқеадир. Зеро, Туркия ва ТДТга аъзо бошқа давлатлар билан кенг қамровли алоқаларни мустаҳкамлаш Тошкент учун стратегик аҳамиятга эга.

Бу, бир томондан, Ўзбекистоннинг ғарбий йўналишда (Жанубий Кавказ, Туркия, Жануби-Шарқий Европа) транспорт-логистика боғлиқлигини ривожлантиришдан манфаатдорлиги, иккинчи томондан эса саноат ва қишлоқ хўжалигининг йирик сармоя ва кўп меҳнат талаб қиладиган тармоқларига инвестиция ҳамда технологияларни жалб этиш, гуманитар йўналишдаги ҳамкорликни кенгайтириш зарурати билан боғлиқдир.

ТДТ етакчиси сифатида Туркия учун ҳам, ташкилотнинг бошқа аъзолари учун ҳам бугунги кунда Ўзбекистон салмоқли иқтисодий, демографик ва маданий салоҳиятга эга таянч давлат сифатида муҳим аҳамият касб этади.

ТДТнинг ривожланиш стратегияси ва Ўзбекистоннинг бир вақтнинг ўзида бир нечта – шимолий (Россия), жанубий (Афғонистон, Покистон ва Ҳиндистон) ҳамда шарқий (ХХР) йўналишларда пухта ўйланган кўп векторли сиёсат юритишга бўлган интилиши бир-бирини мукаммал тўлдиради.

Ўзбекистоннинг ТДТ, жумладан, Туркия билан алоқалари мустаҳкамланиши Евроосиёнинг глобал сиёсий ва иқтисодий пойдеворини шакллантиришга салмоқли ва ижобий ҳисса қўшиб, барқарор ҳамда изчил ривожланиш учун қулай шароит яратади.

ТДТ доирасидаги музокаралар якунлари Ўзбекистоннинг ташкилот билан бир вақтнинг ўзида бир нечта соҳалар – логистика, савдо, саноат кооперацияси ва маданий-гуманитар йўналишлардаги ҳамкорлигига янги суръат бағишлайди.