АММОН, 25 июль. /"Дунё" АА/. Иорданиянинг "Ammon News" газетасида бўлажак "Ёшлар – келажак бунёдкорлари!" III халқаро қурултойига бағишланган мақола эълон қилинди, деб хабар қилмоқда "Дунё" АА мухбири.

Шу йилнинг 8–13 август кунлари Қашқадарё вилоятининг Шаҳрисабз туманида "Ёшлар - келажак бунёдкорлари!" III халқаро қурултойи бўлиб ўтади, деб маълум қилинган материалда.

 Тадбир Экология, атроф-муҳитни муҳофаза қилиш ва иқлим ўзгариши вазирлиги, Туризм қўмитаси, Қашқадарё вилоят ҳокимлиги ва бошқа вазирликлар билан ҳамкорликда ташкил этилмоқда.

"Қурултойнинг тантанали очилиш маросими 9 август Шаҳрисабзнинг Оқсарой мажмуасида ўтказилади. Шунингдек, иштирокчиларни турли танловлар, плоггинг мусобақалари, экологик ва туристик лойиҳалар, китобхонлик куни, миллий ва этноспорт мусобақалари, ёшлар учун бизнесни ташкил қилиш, маданий-кўнгилочар тадбирлар ва таниқли инсонлар билан учрашувлар кутмоқда", – деб ёзган "Ammon News".

Иордания нашрида таъкидланганидек, қурултой 1000 нафарга яқин ўзбекистонлик ва хорижлик ёшларни ўз атрофида бирлаштиради. Мақсад ёшларнинг экология ва ижтимоий-иқтисодий соҳалардаги фаоллигини ошириш, уларни туризм соҳасига кенг жалб этиш, ёш авлоднинг экология ва туризм соҳасидаги истиқболли ғоялари ҳамда лойиҳаларини рўёбга чиқаришдир.