БЕРЛИН, 5 октябрь. /“Дунё” АА/. Германиянинг нуфузли “Berliner Zeitung” газетасида Ўзбекистоннинг халқаро транспорт ва логистика соҳасидаги режалари ҳамда истиқболларига бағишланган таҳлилий мақола эълон қилинди, деб хабар бермоқда “Дунё” АА мухбири.

Мақолада таъкидланишича, Ўзбекистон бевосита денгизга чиқиш имкониятига эга эмас, бироқ Президент Шавкат Мирзиёев бошчилигидаги ҳукумат бу географик чекланишни стратегик устунликка айлантиришни мақсад қилган.

Нашр маълумотларига кўра, Тошкент Каспий ва Қора денгиз қирғоқларида логистика базаларини яратиш, Жанубий Кавказ портларини ривожлантиришда иштирок этиш, шунингдек, Арманистон орқали ўтувчи савдо йўлида муҳим ўрин эгаллашни режалаштирмоқда. Хусусан, Грузия билан Поти порт ҳудудида Ўзбекистоннинг омборхона ва транспорт-логистика объектларини барпо этиш бўйича аллақачон битим имзоланган. Шунингдек, мамлакатимиз Актау, Туркманбоши ва Боку портларини модернизация қилишда ҳам қатнашиш ниятида.

“Ўзбекистоннинг ёндашуви жуда аниқ — мамлакат биттагина транспорт йўналишига боғланиб қолмасдан, бир вақтнинг ўзида муқобил йўлакларни максимал даражада ривожлантиришга интилмоқда. Бироқ мазкур режаларни амалга ошириш кўп жиҳатдан молиялаштириш масалалари, Анаклия лойиҳасининг тақдири ва транспорт йўлакларининг муддатларига боғлиқ”,-  дея хулоса қилинади газетада.