АЛ-КУВАЙТ, 9 ноябрь. /"Дунё" АА/. Кувайтнинг "Ал-Жарида", "Ал-Рай" ва "Q8 Press"  газеталарида "Бухоро ва Сирдарёда Кувайт-Ўзбекистон бизнес-форуми бўлиб ўтади" сарлавҳали мақолалар чоп этилди, деб хабар бермоқда "Дунё" АА мухбири.

 Ўзбекистоннинг Кувайтдаги элчиси Аюбхон Юнусов интервьюси асосида тайёрланган мақолаларда жорий йил 18-19 ноябрь кунлари Бухоро ва Сирдарё вилоятларида Ўзбекистон-Кувайт бизнес-форуми бўлиб ўтиши маълум қилинган.

"Элчи Аюбхон Юнусовнинг айтишича, жорий йилнинг октябрь ойида бўлиб ўтган биринчи Ўзбекистон-Кувайт бизнес-форуми муваффақиятли ўтказилди. Навбатдаги форумга ҳам кўплаб кувайтлик инвесторлар қизиқиш билдирмоқда. Ташриф давомида Ўзбекистон ҳудудларига, хусусан Бухоро ва Сирдарё вилоятларида яратилган бизнес муҳит билан ҳамда маданий-тарихий объектлар билан таниш имконияти мавжуд", – дейилган нашрда. 

Мақолалар Ўзбекистон дипломатик ваколатхонаси раҳбарининг қўйидаги сўзлари билан якунланган: "Сиз ҳеч иккиланмай Ўзбекистонга сафар қилинг. Биз юқори даражадаги учрашувларни ташкил этишдан ташқари, саноат ва савдо корхоналари, бозорларга ташрифларни ташкил қиламиз. Шунингдек, икки давлат ишбилармонлари ўртасида В2В шаклидаги музокаралар уюштирилади".