СТОКГОЛЬМ, 2 декабрь. /“Дунё” АА/. Мамлакатимиз элчихонаси дипломатлари Швециянинг Лунд ва Мальмё шаҳарларида истиқомат қилаётган ватандошлар билан учрашди, деб хабар бермоқда “Дунё” АА мухбири.

Учрашувда Лунд ва Мальмё университетларида профессор, илмий тадқиқотчи бўлиб ишлаётган втандошлар, тиббиёт, муҳандислик, сунъий интеллект каби йўналишларда фаолият юритаётган бир гуруҳ ҳамюртларимиз иштирок этди.

Мулоқотнинг асосий мавзуси консуллик-ҳуқуқий масалалар, Ўзбекистон–Швеция ўртасидаги фан, таълим ва инновациялар соҳасидаги алоқаларни кенгайтириш истиқболлари бўлди.

Сўнгги йилларда Ўзбекистон олий таълим муассасалари ва тегишли давлат ташкилотларининг Лунд университети билан турли лойиҳалар, жумладан, ҳуқуқий ислоҳотларни қўллаб-қувватлаш, яширин иқтисодиёт ва ноқонуний миграцияга қарши кураш соҳаларидаги илмий-тадқиқот алоқалари ривожланмоқда.