ФРАНКФУРТ-МАЙН, 8 ноябрь. /“Дунё” АА/. Германиянинг ташқи савдо ва инвестициялар агентлиги – “Germany Trade & Invest” (GTAI) порталида “Ўзбекистон газ билан бир қаторда шамол ва қуёш энергетикасига ҳам таянмоқда” сарлавҳали мақола эълон қилинди, деб хабар бермоқда “Дунё” АА мухбири.

Агентлик маълумотларига кўра, йил охирига қадар мамлакатда 6,7 гигаваттдан ортиқ янги қувватларни ишга тушириш режалаштирилган бўлиб, уларнинг қарийб ярмини қуёш ва шамол станциялари ташкил этади. Йирик лойиҳаларда Саудия Арабистонининг “ACWA Power” ва Бирлашган Араб Амирликларининг “Masdar” компаниялари иштирок этмоқда. Қайта тикланадиган энергетика соҳасига киритилган инвестициялар ҳажми эса 2025 йил ўрталарига келиб 6 миллиард долларга етди.

2030 йилга қадар 220 киловольтли тўққизта, 500 киловольтли еттита подстанция ҳамда 5 минг километрга яқин электр узатиш тармоқларини қуриш кўзда тутилган. Ҳукумат прогнозларига кўра, ушбу муддатга бориб электр энергияси ишлаб чиқариш ҳажми 129 миллиард киловатт-соатга етади, қайта тикланадиган манбаларнинг улуши эса 54 фоизни ташкил қилади.

Шунингдек, мамлакат газ генерациясини ривожлантирмоқда, “Росатом” иштирокида биринчи АЭС қурилиши лойиҳасига киришди ва Хитой компаниялари билан қиймати қарийб 933 миллион долларлик чиқиндилардан электр энергияси ишлаб чиқариш бўйича олтита лойиҳага тайёргарлик кўрмоқда.

GTAI германиялик компаниялар учун муҳандислик лойиҳалари, трансформаторлар ва юқори кучланишли ускуналарни етказиб бериш, тармоқларни автоматлаштириш ва рақамли бошқариш соҳаларида кенг истиқболларни кўрмоқда.