ИСЛОМОБОД, 5 октябрь. /“Дунё” АА/. Пакистаннинг марказий ахборот агентлиги — “Associated Press of Pakistan” нашрида Ўзбекистоннинг жаҳон технологик аутсорсинг бозоридаги ўрни ва эришаётган ютуқларига бағишланган мақола эълон қилинди, деб хабар бермоқда “Дунё” АА мухбири.

Мақолада мамлакатимизда IT-аутсорсинг хизматлари ҳажми 2019 йилдаги 3,2 миллион доллардан 2025 йилда 716,4 миллион долларга етгани, IT-компаниялар сони эса 369 тадан 3,4 мингтага кўпайгани алоҳида қайд этилган. Шу билан бирга, умумий IT-хизматлар ҳажми 2,8 миллиард долларни ташкил этгани таъкидланган. Муаллифнинг фикрича, энг муҳим ўзгариш фақат рақамларнинг ўсишида эмас, балки Ўзбекистоннинг халқаро хизматлар занжиридаги роли ўзгариб, мамлакат алоҳида технологик вазифаларни бажаришдан корпоратив функцияларнинг кенг спектрини жойлаштириш босқичига ўтаётганидир.

Нашрда Ўзбекистонда 220 дан ортиқ университет фаолият юритаётгани, уларнинг 145 тасида IT-йўналишлари бўйича таълим берилаётгани ёритилган. Бугунги кунда технологик аутсорсинг фақат дастурлаш билан чекланиб қолмаяпти — BPO (мижозларга хизмат кўрсатиш, маълумотларни қайта ишлаш, маъмурий ва операцион жараёнлар) йўналиши ҳам жадал ривожланмоқда. Ушбу соҳада 540 дан зиёд компания ва 14,5 мингдан ортиқ мутахассис меҳнат қилмоқда (таққослаш учун, 2020 йилда атиги 136 нафар ходим бўлган).

“IT Park Uzbekistan” экосистемасида 4 мингдан ортиқ компания фаолият юритаётгани, улардан 1,1 мингдан зиёди 75 та хорижий давлат капитали иштирокида ташкил этилгани ва яратилган иш ўринлари сони 56 мингдан ошиб кетгани урғуланган.

Мақола якунида таъкидланганидек, Ўзбекистон жаҳон аутсорсинг бозорига чиқиш учун зарур шароитларни — йирик ва ёш кадрлар базаси, ривожланаётган IT-сектор, кенгаяётган BPO ва KPO йўналишлари ҳамда тегишли инфратузилмани аллақачон шакллантириб бўлди. Бироқ келажакдаги тараққиёт эндиликда компаниялар сони билан эмас, балки экспорт шартномаларининг ўртача ҳажми, бажарилаётган функциялар мураккаблиги, йирик халқаро жамоалар ва юқори қўшилган қийматга эга хизматлар улуши билан ўлчанади.