МОСКВА, 6 апрель. /“Дунё” АА/. Россиянинг “Вести Туризм” ахборот агентлигида “Ўзбекистон хавфсиз ва очиқ туристик йўналиш сифатида ўз мавқеини мустаҳкамламоқда” сарлавҳали мақола эълон қилди, деб хабар бермоқда “Дунё” АА.

Қайд этилишича, 2025 йил якунларига кўра, Ўзбекистон туризм соҳасида барқарор ижобий ўсишни намойиш этмоқда. Мамлакатга 12 миллионга яқин хорижий сайёҳ ташриф буюргани маълум қилинган, бу эса ўтган йилга нисбатан 16 фоизга кўпдир.

Шунингдек, туристик хизматлар экспорти 4,8 миллиард АҚШ долларига етгани қайд этилади. Бу Ўзбекистоннинг минтақадаги энг истиқболли сайёҳлик йўналишларидан бири сифатидаги мавқеини янада мустаҳкамлашига далолат беради.

Материалда дунёнинг айрим минтақаларидаги геосиёсий беқарорлик шароитида сайёҳлар хавфсизлиги ва қулайлиги муҳим аҳамиятга эга экани таъкидланган.

“Ўзбекистон барқарор, хавфсиз ва очиқ давлат сифатида, барча миллат ва дин вакиллари учун меҳмондўстлигини сақлаб келмоқда. Туризм соҳасидаги ислоҳотлар, замонавий инфратузилма ва очиқлик сиёсати мамлакатнинг хавфсиз ва жозибадор сайёҳлик йўналиши сифатидаги мавқеини янада мустаҳкамламоқда”, дея хулоса қилинган мақолада.