ОСЛО, 6 апрель. /“Дунё” АА/. Норвегия пойтахтида иккинчи жаҳон урушида Норвегияда дафн этилган ўзбекистонлик аскарлар хотирасига бағишланган тадбир ўтказилди, деб хабар бермоқда “Дунё” АА мухбири.

Мамлакатимизнинг Стокгольмдаги элчихонаси, Ўзбекистон мусулмонлар идораси ва Норвегиядаги ўзбек диаспораси вакилларидан иборат делегация “Vestre Gravlund Cemetery” қабристонини зиёрат қилди.

Ушбу зиёратда Иккинчи жаҳон уруши йилларида ҳалок бўлган ва шу ердаги қабристонда дафн этилган ўзбекистонлик аскарлар хотираси ёд этилди. Делегация аъзолари марҳумлар руҳига дуо қилди.

Мазкур учрашув тарихий хотирани асраб-авайлаш, аждодлар руҳига эҳтиром билдириш ва келажак авлодларга тинчлик қадрини етказишда муҳим маънавий аҳамиятга эга бўлди.

Норвегияда Иккинчи жаҳон уруши даврида ҳалок бўлган тахминан 13 минг 700 нафар собиқ совет ҳарбий асирлари дафн этилган. Шундан 7 минг 800 нафарининг шахси аниқланган. Дафн этилганларнинг кўпчилиги Марказий Осиё, Кавказ ва Беларусь ҳудудларидан бўлган. Ўзбекистондан эса 12 нафар аскар “Vestre Gravlund Cemetery” қабристонида дафн этилган.