АМСТЕРДАМ, 14 февраль. /“Дунё” АА/. Бельгиядаги элчихонамиз дипломатлари томонидан “Netherlands Enterprise Agency” (RVO) агентлиги билан ҳамкорликда Нидерландия ишбилармон доиралари ва компаниялари вакиллари учун мамлакатимизнинг иқтисодий салоҳиятига бағишланган тақдимот ўтказилди, деб хабар бермоқда “Дунё” АА мухбири.

Тадбир давомида дипломатлар Ўзбекистонда амалга оширилаётган сўнгги ислоҳотлар, иқтисодий ўсишни таъминлаш борасидаги ютуқлар ва инвестиция муҳитини яхшилаш борасидаги саъй-ҳаракатлар ҳақида батафсил маълумот бердилар.

Нидерландиянинг Ўзбекистондаги элчиси Нико Схермерс ўз чиқишида республиканинг ижтимоий-иқтисодий ривожланишидаги ижобий натижаларни алоҳида эътироф этди. У Нидерландия компанияларини яратилган имкониятлардан фаол фойдаланишга, қўшма лойиҳаларни амалга ошириш учун инвестициялар, замонавий технологиялар ва билимларни жалб қилишга чақирди.

Нидерландия компаниялари вакиллари ўзбекистонлик шериклар билан тўғридан-тўғри алоқалар ўрнатиш, қўшма инвестиция лойиҳаларини ҳаётга татбиқ этиш ҳамда Ўзбекистонда ўтказиладиган тармоқ форумлари ва бизнес-миссияларда иштирок этишга катта қизиқиш билдирдилар.

Учрашув якунида биргаликда ишлашнинг аниқ йўналишлари ва мулоқотни изчил давом эттириш бўйича келгуси режалар келишиб олинди.