КАРАКАС, 29 июнь. /“Дунё” АА/. Венесуэладаги вайронкор зилзила қурбонлари сони ортиб бормоқда: сўнгги маълумотларга кўра, камида 1450 киши ҳалок бўлган, деб хабар бермоқда “Дунё” АА мухбири “CNN”га таяниб.

Ла-Гвайре ва Каракас шаҳарларида қидирув-қутқарув ишлари давом этмоқда. Таҳлилларнинг ёмонлашишига қарамай, қутқарувчилар омон қолганларни топишга муваффақ бўлишди.

Венесуэла президенти вазифасини бажарувчи Делси Родригеснинг айтишича, дам олиш кунлари вайроналар остидан 33 киши қутқарилган. Қутқарилганлар орасида чақалоқ, вайроналар остида уч кундан ортиқ вақт ўтказган аёл, шунингдек, бир неча соатлик фарқ билан қутқарилган 11 ёшли икки бола бор.

Шу билан бирга, ўн минглаб одамлар бедарак йўқолган, янги тирик қолганларни топиш умиди эса соат сайин камайиб бормоқда. Инсонпарварлик ташкилотлари вакиллари табиий офатдан кейинги дастлабки 48–72 соат одамларни қутқариш учун энг муҳим вақт эканини эслатиб ўтмоқда.

Делси Родригес воқеани Венесуэла тарихидаги “Энг даҳшатли табиий офат” деб атади ва зарарни баҳолаш бўйича комиссия тузилишини эълон қилди. Унинг сўзларига кўра, халқаро ёрдам ва хорижий қутқарувчиларнинг келиши фавқулодда хизматлар ишини кучайтиради ва гуманитар оқибатларни бартараф этишга ёрдам беради.

Эслатиб ўтамиз, чоршанба куни 7,2 ва 7,5 магнитудали иккита зилзила 39 сония оралиғида содир бўлган. Натижада, 800 га яқин бино қулаб тушди, одамлар вайроналар остида қолди.

Кўпгина жабрланган ҳудудларда қариндошлар вайроналарни мустақил равишда тозалашни давом эттирмоқда. Баъзилар вайроналар остида одамларнинг овозини эшитаётганини, бироқ оғир бетон плиталарни махсус техникадан фойдаланмасдан силжитолмаётганини маълум қилган.

“AP” агентлиги сурати