ДАМАШҚ, 19 август. /“Дунё” АА/. АҚШ Исроилнинг Суриядаги Абу Дуҳур авиабазасига берилган зарбалари юзасидан эътироз билдириб, бу ҳаракатларни “минтақавий барқарорликка ҳисса қўшмайдиган кераксиз кескинлашув” дея атади, деб хабар бермоқда “Дунё” АА мухбири “Reuters” агентлигига таяниб.

Қайд этилишича, 18 август куни Исроил зарбалари натижасида Туркия чегарасидан қарийб 70 километр узоқликда жойлашган авиабазанинг учиш-қўниш йўлаги ва омборхоналари шикастланган. Жабрланганлар ҳақида ҳозирча маълумот йўқ.

АҚШнинг Туркиядаги элчиси ҳамда Сурия ва Ироқ бўйича махсус вакили Том Баррак Вашингтон ушбу зарбалардан “чуқур хавотирда” эканини билдирди. Унинг сўзларига кўра, Сурия президенти Аҳмад аш-Шараа ўзига бўйсунувчи қуролли тузилмаларни ташкил этмаяпти ва Исроил билан зиддиятни юмшатиш тарафдори эканини бир неча бор таъкидлаган. АҚШ томонлар ўртасидаги дипломатик музокараларга кўмаклашишга тайёр.

Исроил бош вазири Биньямин Нетаньяҳунинг идораси Сурия Туркия қўшинларининг авиабазага жойлашишига рухсат бериб, хавфсизлик соҳасидаги статус-кво келишувларини бузишга яқин қолганини қайд этди. Исроил бундай ҳолат унинг хавфсизлигига таҳдид солишидан огоҳлантирган.

Туркия бу айбловларни рад этиб, уларни Исроилнинг Сурия суверенитетига қарши зарбаларини оқлашга уриниш деб атади. Шунингдек, Анқара Сурия ҳукумати билан ҳамкорликни давом эттириши ва мамлакатда беқарорликка йўл қўймаслигини билдирди. Шу билан бирга, Туркия ўз ҳарбийларини Абу Дуҳур базасига жойлаштирганини тасдиқламади.

Авиабаза 2013 йилдан бери тўлақонли ҳарбий аэродром сифатида фойдаланилмаётган эди ва 2024 йил декабрь ойида собиқ президент Башар Асаднинг ағдарилишига олиб келган ҳужумлар чоғида исёнчи кучлар назоратига ўтган. Шундан сўнг Сурия жанговар ҳаракатлар давомида вайрон бўлган ҳарбий инфратузилмани тиклай бошлади.

Ушбу зарбалар Исроилнинг сўнгги ойларда Сурияга уюштирган энг жиддий ҳужумларидан бирига айланди ва минтақада кескинлик кучайиб бораётган бир пайтда содир бўлди.

“Reuters” агентлиги сурати