ДЕҲЛИ, 13 январь. /«Дунё» АА/. Ҳиндистонлик тадбиркорларнинг Ўзбекистон билан ишбилармонлик алоқаларини ривожлантиришга бўлган қизиқиши ортиб бораётган бир шароитда “Textile Insights” ихтисослашган нашри мамлакатимиз тўқимачилик тармоғидаги кенг кўламли трансформация жараёнига бағишланган иккита таҳлилий материал эълон қилди, деб хабар бермоқда «Дунё» АА мухбири.

Ушбу материалларда Ўзбекистонни халқаро инвестициялар, шу жумладан, Ҳиндистон сармояси учун жозибадор ҳамкорга айлантираётган асосий ўсиш драйверларига алоҳида тўхталиб ўтилган.

«Ўзбекистон пахтачиликни технологиялар ва механизациялаштириш орқали қайта тикламоқда» (Uzbekistan reboots cotton with tech and mechanisation) сарлавҳали мақолада нашр экспертлари мамлакатимиз пахтачилик соҳасидаги чуқур ислоҳотларни таҳлил қилган. Унда мажбурий меҳнатдан тўлиқ воз кечилиб, кластер бошқарув тизимига ўтиш орқали ҳайратланарли натижаларга эришилгани қайд этилган.

Ҳиндистонлик инвесторлар учун юқори технологияларнинг жорий этилиши асосий жалб қилувчи омил бўлмоқда. Нашр пахта теримини механизациялаштириш ва томчилатиб суғориш тизимларини татбиқ этиш масалаларига алоҳида эътибор қаратган.

Модернизация жараёни агротехнологиялар соҳасида илғор тажрибага эга бўлган Ҳиндистон компаниялари учун қўшма корхоналар ташкил этишда истиқболли имкониятлар очмоқда. «Ўзбекистон пахтачилик тармоғини самарадорлик ва барқарор ривожланишга таянган ҳолда янгиламоқда, бу эса технологик шериклик учун қулай муҳит яратмоқда», деб қайд этган “Textile Insights”.

«Ўзбекистон тўқимачилик саноати ўсишини тезлаштириш учун 2 миллиард доллар миқдорида янги инвестицияларни жалб қилишни режалаштирмоқда» (Uzbekistan targets US$ 2 bn in new investment to accelerate textile industry growth) сарлавҳали иккинчи мақолада Тошкент томонидан илгари сурилган инвестициявий режаларга эътибор қаратилган.

Ҳиндистон бизнес ҳамжамияти Ўзбекистоннинг тўқимачилик индустриясига қўшимча 2 миллиард доллар инвестиция жалб этиш борасидаги мақсадларини диққат билан ўрганиб чиқмоқда.

Тўқимачилик ва кийим-кечак ишлаб чиқаришда дунё етакчиларидан бири бўлган Ҳиндистон мамлакатимизни стратегик хаб сифатида кўрмоқда. Нашрнинг таъкидлашича, Ўзбекистон жозибали шароитлар таклиф қилмоқда, яъни мамлакат солиқ имтиёзлари тақдим этмоқда, технопаркларда тайёр инфратузилма шакллантирилган ҳамда Европа ва МДҲ бозорларига чиқиш имконияти яратилган.

Бу эса ҳиндистонлик тадбиркорларни ишлаб чиқариш қувватларини республикага кўчиришга ва «Made in Uzbekistan» бренди остида юқори қўшимча қийматга эга маҳсулотлар ишлаб чиқаришга ундамоқда.

Ҳиндистон ОАВ ва бизнесининг қизиқиши икки томонлама муносабатлар сифат жиҳатидан янги босқичга кўтарилганидан далолат берувчи аниқ рақамлар билан асосланган.

2025 йил икки давлат ўртасидаги иқтисодий шериклик учун тарихий йил бўлди. Ўзаро товар айирбошлаш ҳажми илк бор 1 миллиард долларлик муҳим маррадан ошди. Бундан ташқари, ўсиш динамикаси ҳам салмоқли: январь-ноябрь якунларига кўра, бу кўрсаткич 1 миллиард 200 миллион доллардан зиёдни ташкил этди.

Бугунги кунда Ўзбекистон ва Ҳиндистон нафақат ўзаро манфаатли савдо, балки чуқур ишлаб чиқариш кооперацияси билан ҳам боғланган. Ҳозирги вақтда республикада ҳиндистонлик шериклар билан биргаликда умумий қиймати 1 миллиард 130 миллион доллардан ортиқ бўлган 24 та инвестиция лойиҳаси амалга оширилмоқда.

Сармояларни ўзлаштириш жараёни жадал давом этмоқда. Бугунги кунга қадар 270 миллион долларга яқин тўғридан-тўғри Ҳиндистон инвестициялари ўзлаштирилди. Ушбу маблағлар тўқимачилик, фармацевтика, ахборот технологиялари, қишлоқ хўжалиги, таълим ва бошқа соҳаларга йўналтирилган.

“Textile Insights” таҳлили Ҳиндистон бизнеси Ўзбекистонни Марказий Осиёдаги асосий шерик сифатида баҳолаётганини тасдиқлайди. Ўзбекистондаги ислоҳотлар ва Ҳиндистон технологияларининг уйғунлиги, шунингдек, давлат даражасидаги қўллаб-қувватлов келгуси юксалиш учун мустаҳкам пойдевор яратмоқда.