ТОШКEНТ, 23 апрель. /“Дунё” АА/. Пойтахтимизда Швеция миллий савдо кенгаши етакчи экспертлари томонидан ўзбекистонлик мутахассислар учун савдо ва халқаро стандартлар бўйича семинар-тренинг ташкил этилди, деб хабар бермоқда “Дунё”АА мухбири.

Мазкур семинар-тренингда Ўзбекистоннинг қатор вазирлик ва идоралари, жумладан, Техник тартибга солиш агентлиги, Бандлик, Фавқулодда вазиятлар, Қишлоқ хўжалиги, Транспорт, Соғлиқни сақлаш, Рақамли технологиялар, Энергетика ва Қурилиш вазирликлари ҳамда Саноат, радиация ва ядро хавфсизлиги қўмитаси мутахассислари иштирок этди.

Хорижлик экспертлар халқаро амалиёт асосида техник жиҳатдан тартибга солиш таъсирини баҳолаш механизмлари ҳақида алоҳида сўз юритди. Хусусан, швециялик мутахассислар Скандинавия давлатлари савдо сиёсатининг ўзига хос хусусиятлари ҳақида тўхталиб, ўзбекистонлик экспортчилар учун тўлов қобилияти юқори бўлган ушбу бозорга чиқиш имкониятлари хусусида керакли тавсиялар берди.

Мулоқотлар якунида иштирокчилар савдо сиёсатини халқаро стандартларга мослаштириш ва техник тўсиқларни бартараф этиш бўйича ўзаро тажриба алмашди. Томонлар келгусида ушбу йўналишдаги ҳамкорликни изчил давом эттиришга келишиб олди.