РИМ, 19 декабрь. /“Дунё” АА/. Мамлакатимиз Элчихонаси кўмагида Ўзбекистон Олий Мажлиси палаталари ва Италия парламентидаги ўзаро дўстлик гуруҳлари ўртасида онлайн мулоқот ташкил этилди, деб хабар қилмоқда “Дунё” АА мухбири.

Учрашувда Ўзбекистон ва Италия ўртасидаги парламентлараро мулоқотни янада мустаҳкамлаш, ўзаро ҳамкорлик алоқаларини кенгайтириш ҳамда дўстлик гуруҳлари аъзоларидан ташкил топган делегациялар алмашинувини ташкил этиш каби масалалар муҳокама қилинди.

Тадбирда сўзга чиққан Қонунчилик палатаси спикери ўринбосари, дўстлик гуруҳи раҳбари Раҳим Хакимов мамлакатлар ўртасидаги алоқалар, стратегик шериклик муносабатларининг сўнгги йилларда сифат жиҳатидан янги босқичга кўтарилгани ҳамда олий даражадаги ташрифлар сабабли, кўп қиррали ҳамкорлик янада ривожланиб бораётганини таъкидлади.

Эътиборлиси, 2025 йилнинг ўзида ташкил этилган икки давлат парламентларининг юқори даражадаги ташрифлари мамлакатлар ўртасида дўстлик алоқаларини тобора мустаҳкамламоқда.

“Италия–Марказий Осиё” дўстлик гуруҳи раҳбари Фабрицио Бенцони дўстлик руҳида ўтказилган биринчи мулоқотдан хурсанд бўлгани, Ўзбекистон томонининг таклифига биноан 2026 йилда юртимизга Италия парламенти делегацияси билан ташриф буюришидан мамнун эканини маълум қилди.

Видеоконференция давомида депутатлар дўстлик гуруҳлари аъзолари билан яқиндан танишди, парламентлар фаолияти ва ишлаш тамойиллари ҳамда тажрибаси тўғрисида фикр алмашди, истиқболли ҳамкорлик йўналишларини белгилаб олди.