КАЛГАРИ, 19 март. /“Дунё” АА/. Канаданинг Альберта провинциясида “Ўзбек-Канада ассоциацияси” диаспора ташкилоти билан ҳамкорликда ифторлик тадбири ташкил этилди, деб хабар бермоқда “Дунё” АА мухбири.

Ўзбекистоннинг АҚШдаги элчихонаси томонидан ташкил этилган ушбу хайрли тадбирга 150 нафарга яқин ватандошлар жамланди.

Ифторликдан кўзланган асосий мақсад — давлат тузилмалари ва диаспора ўртасидаги алоқаларни мустаҳкамлаш, Канададаги ҳамюртлар ўртасида ҳамжиҳатлик ва ўзаро дўстлик алоқаларини ривожлантиришдан иборат бўлди.

Элчихона дипломатлари юртдошларни муқаддас Рамазон ойи билан қутлаб, хориждаги фуқароларнинг, жумладан, ижтимоий ҳимояга муҳтож тоифаларнинг ҳуқуқ ва манфаатларини ҳимоя қилиш борасида амалга оширилаётган ишлар ҳақида маълумот берди. Миллий ва диний қадриятларни асраб-авайлаш ҳамда диаспора билан ўзаро ҳамкорликни кучайтириш муҳимлиги алоҳида қайд этилди.

Ифторликдан аввал фуқаролар учун консуллик хизматлари ташкил этилди. Ҳамюртлар билан мулоқот давомида уларнинг яшаш ва иш шароитлари, мослашув жараёнлари ўрганилди.

Элчихона вакилларининг Калгарига ташрифи илк бор амалга оширилгани таъкидланди. Иштирокчилар хориждаги ватандошларга кўрсатилаётган эътибор учун миннатдорлик билдирди.

Самая Рахимова:

— Альберта провинциясида истиқомат қилувчи ҳамюртларимиз учун ташкил этилган ифторлик юксак даражада бўлиб ўтди. Ушбу кеча Ўзбекистон Президенти Шавкат Мирзиёевнинг ташаббуслари ва ҳукуматнинг қўллаб-қувватлаши туфайли биз учун айниқса қадрлидир. Калгарида бундай тадбир биринчи марта ўтказилмоқда ва биз бу ташрифдан чин дилдан хурсандмиз. Хорижда яшашимизга қарамай, биз миллий ўзлигимизни сақлаб қолмоқдамиз ва Ватанимизни фахр билан намоён этяпмиз.

Суҳроб Муродов:

— Президентимизга, элчихона вакилларига ва Калгаридаги ўзбек ассоциациясига бугунги гўзал тадбирни ташкил этганлари учун самимий миннатдорлик билдираман. Биз биринчи марта ўтказилаётган бундай ифторликдан жуда хурсандмиз ва у эзгу анъанага айланишига умид қиламиз.

Шоиста Раимова:

— Элчихона вакиллари томонидан ташкил этилган бугунги ифторликни чинакам тарихий воқеа, деб ҳисоблайман. Давлатимиз томонидан кўрсатилаётган эътибор ва қўллаб-қувватлашни ҳис қилаётганимиздан жуда мамнунмиз ва миннатдормиз. Ўзбекистон Президенти Шавкат Мирзиёевга хориждаги ватандошларга кўрсатаётган ғамхўрлиги ва доимий эътибори учун, элчихона вакилларига меҳнатлари ва кўмаги учун самимий ташаккур айтамиз. Шунингдек, июнь ойида бўлиб ўтадиган Ўзбекистон — Канада ўртоқлик учрашувида терма жамоамизни қўллаб-қувватлашга умид қиламиз ва унинг Жаҳон чемпионатидаги муваффақиятига ишонамиз.