ПАРИЖ, 21 март. /“Дунё” АА/. ЮНЕСКОнинг Париждаги бош қароргоҳида Ўзбекистоннинг доимий вакили Камол Мухторов ва ташкилот бош директорининг биринчи ўринбосари Оса Регнер ўртасида учрашув бўлиб ўтди, деб хабар бермоқда “Дунё” АА мухбири.

Музокаралар аввалида Ўзбекистон томони Оса Регнерни юқори лавозимга тайинлангани билан табриклади ва унинг халқаро тажрибаси тармоқлараро мувофиқлаштиришни кучайтириш ва ЮНЕСКОнинг амалий йўналтирилган фаолиятини ривожлантиришга хизмат қилишига ишонч билдирди.

Учрашувда Ўзбекистон Президенти Шавкат Мирзиёевнинг Самарқандда бўлиб ўтган ЮНЕСКО Бош конференциясининг

43-сессиясида илгари сурган ташаббусларига алоҳида эътибор қаратилди. Ушбу таклифлар ташкилот билан ҳамкорликни кенгайтириш ва глобал муаммоларни ҳал қилишда унинг ролини кучайтириш стратегиясининг бир қисми экани таъкидланди.

Ўзбекистоннинг гендер тенглик ҳамда хотин-қизларнинг ҳуқуқ ва имкониятларини кенгайтириш соҳасидаги ташаббуслари тизимли давлат сиёсатига таяниши алоҳида таъкидланди. Бу йўналишлар мамлакатимизнинг янгиланган Конституциясида, шунингдек, “Ўзбекистон – 2030” стратегияси ва Гендер тенгликка эришиш миллий стратегиясида мустаҳкамлаб қўйилган.

Томонлар Ўзбекистон ва ЮНЕСКО ўртасидаги ҳамкорликнинг жадал ривожланишини муҳокама қилди. Кун тартибидаги асосий йўналишлар бўйича ташкилотнинг тегишли бўлинмалари билан яқин ҳамкорлик йўлга қўйилгани таъкидланди.

Ҳамкорлик тарихида муҳим воқеа бўлган ЮНЕСКО Бош конференциясининг 43-сессияси Самарқандда ўтказилгани муҳим аҳамиятга эга экани таъкидланди. Оса Регнер Ўзбекистон томонига форум юксак савияда ташкил этилгани ва унинг муваффақиятли ўтказилишига қўшган ҳиссаси учун миннатдорлик билдирди.

Учрашувда Ўзбекистон томони инклюзив таълимни ривожлантириш, аёллар учун имкониятларни кенгайтириш, сифатли болалар маданий контентини илгари суриш, сунъий интеллект ва унинг ахлоқий жиҳатлари соҳасидаги ҳамкорлик каби қатор устувор ташаббусларни амалга ошириш бўйича маълумот берди.

“Бухоро шаҳрининг тарихий маркази” объекти ҳудудида амалга оширилаётган лойиҳалар доирасида ЮНЕСКОнинг Бутунжаҳон мероси маркази билан ўзаро ҳамкорлик масалалари алоҳида муҳокама қилинди.

Учрашув якунида ЮНЕСКО вакили Ўзбекистон билан ҳамкорликни янада мустаҳкамлашга тайёрлигини тасдиқлади, шунингдек, қўшма лойиҳаларни изчил амалга ошириш ва Ўзбекистон раҳбари томонидан илгари сурилган ташаббусларни қўллаб-қувватлашдан манфаатдорлигини билдирди.