СЕУЛ, 13 сентябрь. /“Дунё” АА/. Президент Шавкат Мирзиёев Корея Республикаси Президенти Ли Чжэ Мённинг таклифига биноан бугун давлат ташрифи билан Сеулга келди, деб хабар бермоқда “Дунё” АА мухбири.

Давлат раҳбари ташрифи муносабати билан Жанубий Кореянинг “Citizenadmnews”, “UN Journal”, “Diplomacy Journal” каби етакчи оммавий ахборот воситаларида Жанубий Корея ва Ўзбекистон ўртасидаги муносабатлар ривожига бағишланган мақолалар эълон қилинди.

Нашрлар ёзилишича, икки давлат ўртасидаги ҳамкорлик савдо ва инвестициялардан саноат ҳамда технологик кооперациянинг янада чуқурроқ босқичига ўтмоқда.

ОАВда газ-кимё, автомобилсозлик, тўқимачилик ва фармацевтика соҳаларидаги қўшма лойиҳалар, маҳаллийлаштирилган ишлаб чиқаришни ривожлантириш алоҳида таъкидланган.

Мис, вольфрам, литий, молибден ва бошқа ўта муҳим минералларни қайта ишлаш бўйича ҳамкорлик истиқболларига алоҳида эътибор қаратилмоқда.

Шунингдек, сунъий интеллект, рақамлаштириш ва малакали кадрлар тайёрлаш соҳаларида ўзаро ҳамкорлик фаоллашгани ҳақида хабар берилмоқда.

ОАВнинг қайд этишича, Сеулда бўлиб ўтадиган Жанубий Корея ва Марказий Осиёнинг беш давлати иштирокидаги илк саммит ҳамкорликни кенгайтиришга ҳисса қўшади.