КУАЛА-ЛУМПУР, 23 май. /"Дунё" АА/. Ўзбекистоннинг Куала-Лумпур шаҳридаги элчихонаси ташаббуси билан Тошкент вилояти ҳокимлиги вакиллари кўмагида Малайзияда таҳсил олаётган ватандош талабалар иштирокида "Заковат" интеллектуал ўйини ташкил этилди, деб хабар қилмоқда "Дунё" АА мухбири.

Унда Малайзиянинг Осиё-Тинч океани технология ва инновация, Малайя, "City", "Cyberjaya" "UCSI", "INCEIF", "Xiamen", "МMU", "Lincoln", "INTI", "IIUM" каби нуфузли университетларида таҳсил олаётган ўзбекистонлик талабалар иштирок этди.

Интеллектуал ўйинда Малайзиядаги фаол ёшларимиз 19 та жамоага бўлиниб, ўзаро беллашди.

Тадбир аввалида Тошкент вилояти ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Отабек Султонбеков Ўзбекистон Президентининг 2022 йил 20 январдаги "Заковат" интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида"ги қарорининг мазмун-моҳияти ҳақида тўхталди.

Ўзбекистоннинг ёшларга оид давлат сиёсатининг устувор йўналишлари ва Тошкент вилояти ҳокимлиги томонидан ёшларни ҳар томонлама қўллаб-қувватлаш бўйича олиб борилаётган ишларга эътибор қаратилди.

Ўзбекистон элчиси Каромиддин Гадоев ёшларнинг ҳар томонлама баркамол бўлиб вояга етиши ва таълим-тарбия олиши учун республикада барча шарт-шароитлар яратилаётгани, хорижда таълим олаётган ёшларимизнинг қонуний ҳуқуқ ва манфаатларини таъминлаш давлат сиёсатининг устувор йўналишларидан бири эканлигини таъкидлади.

"Заковат" клуби президенти Абдурасул Абдуллаев мазкур ўйинида иштирокчилар юқори даражадаги билимдонлик, мантиқ ва жамоавий аҳилликни намойиш этганларини қайд этди.

Интеллектуал ўйин якунида биринчи, иккинчи ва учинчи ўринни эгаллаган жамоаларга Тошкент вилояти ҳокими номидан қимматбаҳо совғалар тантанали равишда топширилди. Шунингдек, ёшларнинг илм-фанга қизиқишларини янада ошириш мақсадида Ўзбекистон ёшлари умумжаҳон ассоциацияси китоблар тақдим этилди.

Малайзияда таҳсил олаётган талаба ёшлар республикамиз ҳаётида фаол иштирок этишга, мамлакатимизни янада ривожлантиришга ўз ҳиссаларини қўшишга тайёр эканликларини таъкидладилар.

Захриддин Насрулхонов, Малайзиянинг "Xiamen" университети талабаси:

– Бугун Малайзияда биринчи бор бўлиб ўтган "Заковат" интеллектуал ўйинида "Тошкент вилояти ҳокими соврини" учун кураш олиб бордик. Жамоамиз ушбу ўйинда биринчи ўринни қўлга киритдик. Бизга топширилган совғалар учун Тошкент вилояти ҳокимлигига миннатдорлик билдирамиз.

Муҳаммадсодиқ Ахроров, Малайзиянинг "Xiamen" университети талабаси:

– Малайзияда таҳсил олаётган ватандошлар ўртасида бўлиб ўтган "Заковат" интеллектуал ўйини менда катта таассурот қолдирди. Билимлар беллашувида жамоамиз иккинчи ўринни қўлга киритди. Мен ушбу ўйинда иштирок этиш орқали ўз билимни янада мустаҳкамладим, шунингдек, ўзбек ёшлари орасида билими, зеҳни ва салоҳияти юқори бўлганлар кўп эканлигига яна бир бор гувоҳ бўлдим.

Иброҳимжон Нормуҳаммадов, Ўзбекистон ёшлари умумжаҳон ассоциациясининг Куала-Лумпурдаги координатори

 – Малайзияда таҳсил олаётган ватандош ёшрлар ўртасида ўтказилган "Заковат" интеллектуал ўйини жуда қизиқарли кечди. Танланган саволлар савияси ҳам анча баланд. Иштирокчи жамоаларнинг билим савиясини ҳам алоҳида таъкидлаш керак. Бизнинг жамоамиз ўйинларда фаол иштирок этиб, учинчи ўринни эгаллади.

Фурсатдан фойдаланиб, Тошкент вилояти ҳокимлиги ва Ўзбекистон элчихонасига ушбу қизиқарли белашувни ташкил қилгани ва Малайзиядаги ватандош ёшларни бирлаштиргани учун миннатдорлик билдирамиз. Бундай тадбирлар мунтазам такшил этилиши тарафдоримиз.