СТОКГОЛЬМ, 22 апрель. /“Дунё” АА/. Швеция пойтахтида истиқомат қилаётган бир гуруҳ ўзбекистонликлар ташаббуси билан “Nordic Uzbek” (Nordic Uzbek F.C.) футбол жамоаси ташкил этилди, деб хабар бермоқда “Дунё” АА мухбири.

Маълум қилинишича, мазкур жамоа нафақат Швеция ҳудудида, балки бутун Европа миқёсида ташкил этилган илк ўзбек футбол клубларидан бири сифатида тарихга кирди.

Жамоа ташаббускорларидан бири, Швецияда истиқомат қилаётган ватандошимиз Умид Тоғаевнинг таъкидлашича, бу ғоя Жаҳон чемпионатига чиққан Ўзбекистон миллий терма жамоасининг тарихий йўлланмаси ортидан пайдо бўлган.

“Ўзбекистон терма жамоаси тарихда илк бор жаҳон чемпионатига чиққанидан жуда фахрландик. Бу ютуқ нафақат спорт, балки миллий ғурур манбаи ҳамдир. Шу билан бирга, мамлакатимизни хорижда спорт орқали тарғиб қилиш қанчалик муҳим эканини янада теран англадик. Таклиф ва ташаббусларимиз элчихона томонидан қўллаб-қувватланди”, - дейди у.

2026 йил апрель ойида “Nordic Uzbek” футбол клуби расман рўйхатдан ўтказилиб, Швеция миллий футбол тизимининг дастлабки босқичи – саккизинчи дивизионида иштирок этиш ҳуқуқини қўлга киритди. Бу Европада фаолият юритувчи янги ўзбек жамоаси учун катта спорт йўлининг бошланиши сифатида баҳоланмоқда.

Клуб етакчиларидан бири Ҳабибулла Хўжаевнинг таъкидлашича, жамоа ўзининг илк расмий учрашувини 3 май куни ўтказади.

“Биз учун ҳар бир ўйин – бу катта тажриба ва имконият. Асосий мақсадимиз, босқичма-босқич ривожланиб, келажакда Стокгольмнинг энг кучли жамоалари қаторига киришдир”, дейди у.

Ташаббускорлар фикрича, “Nordic Uzbek” нафақат спорт жамоаси, балки хориждаги ўзбек диаспорасини бирлаштирувчи муҳим ижтимоий платформага айланиши кутилмоқда. Лойиҳа орқали миллий ҳамжиҳатликни мустаҳкамлаш, ёшларни спортга жалб этиш ҳамда Ўзбекистоннинг халқаро имижини ошириш мақсад қилинган.