МАДРИД, 5 октябрь. /Дунё» АА/. Шу йил 2 октябрь куни тунда Мадридда Ғазога гуманитар ёрдам олиб кетаётган «Глобал Сумуд» флотилияси Исроил томонидан тўхтатилиши ортидан Фаластин халқи билан кенг кўламли бирдамлик намойишлари бошланди, деб хабар бермоқда «Дунё» АА мухбири.

Полиция маълумотларига кўра, намойишлар ва митинглар Барселона, ​​Севиля, Билбао, Валенсия ва мамлакатнинг бошқа шаҳарларида ҳам бўлиб ўтмоқда. Намойишлар талабалар уюшмалари, касаба уюшмалари ва инсон ҳуқуқлари ташкилотлари иштирокида ташкил этиляпти.

Намойишчиларнинг асосий талаблари орасида Испаниянинг Исроил билан ҳарбий ҳамкорлигини зудлик билан тўхтатиш, савдо ва дипломатик келишувларни узиш, Фаластиннинг ўз тақдирини ўзи белгилаш ҳуқуқини тан олиш киради. Улар, шунингдек, Европа Иттифоқи ва халқаро ҳамжамият томонидан Исроилга босимни кучайтиришга чақирмоқда. Намойиш ташкилотчиларининг таъкидлашича, Испания ҳукуматининг қадамлари, жумладан, қурол экспорти лицензияларини вақтинчалик тўхтатиб туриш ҳам етарли эмас. Улар Фаластин халқини қўллаб-қувватлаш учун янада қатъий дипломатик ва ҳуқуқий чоралар кўришни талаб қилмоқдалар.

Норозиликларнинг янги тўлқинига Ғазодаги можаронинг кучайиши ва минтақа аҳолиси учун ёрдам олиб кетаётган «Глобал Сумуд» гуманитар флотилиясининг тўхталиши сабаб бўлган. Исроил ҳарбий-денгиз кучлари аллақачон 40 дан ортиқ кемани, жумладан, испан журналисти бўлган Капитан Никосни қўлга олган.

Эслатиб ўтамиз, 40 дан ортиқ давлатдан 450 дан ортиқ фаол, жумладан, 30 нафар Испания фуқароси қўлга олиниб, Исроил портларига ўтказилган.

Мадриддаги намойишлар Ташқи ишлар вазирлиги олдида бошланиб, пойтахтнинг марказий кўчалари бўйлаб юриш билан давом этди. Иштирокчилар Фаластин байроқлари ҳамда «Фаластинга озодлик!» ва «Геноцидга йўқ!» каби шиорлар ёзилган плакатларни кўтардилар.

«Маданий ва сиёсий тафовутлардан қатъий назар, бутун мамлакат бўйлаб Фаластинни қўллаб-қувватлаш учун қаршилик кучайиб бормоқда. Ҳатто кичик шаҳарларда ҳам ташаббус гуруҳлари тузилиб, акциялар ўтказилмоқда. Бу турли ҳаракатлар ва халқларни ягона мақсад йўлида бирлаштиради», деди Барселонадаги намойишлар иштирокчиси Себастян.

Севиляда талабалар шаҳар мерияси олдида йиғилиб, Исроил университетлари билан академик ҳамкорликни тўхтатишни талаб қилди. Иштирокчилардан бири Эдуардо Агилеранинг айтишича, талабалар ҳаракати «Исроил билан алоқалар узилмагунча» тўхтамайди.

Испания ҳукумати ҳодисаларнинг олдини олиш учун хавфсизлик чораларини кучайтирди.

Эслатиб ўтамиз, Исроилнинг флотилияни тўхтатиб қўйгани Греция, Италия, Германия, Тунис ва Туркияда ҳам норозиликларга сабаб бўлди ва бошқа бир қанча мамлакатларда ҳам танқидларга учради. Европа давлатлари Исроилни қўлга олган экипаж аъзоларининг ҳуқуқларини ҳурмат қилишга чақирди. Исроил томони флотилияни «провокацион яхталар» деб таърифлаб, ҳарбийлар кемаларни Ғазо билан чегарадош сувларнинг денгиз блокадасига киришидан олдин тўхтатганини таъкидлади.

Фаластин соғлиқни сақлаш идоралари маълумотларига кўра, Исроилнинг Ғазо секторидаги ҳарбий амалиётлари натижасида аллақачон 66 мингдан ортиқ одам ҳалок бўлган.