МОСКВА, 22 февраль. /“Дунё” АА/. Россия Фанлар академияси Е.М.Примаков номидаги Жаҳон иқтисодиёти ва халқаро муносабатлар миллий тадқиқот институти Яқин Шарқ тадқиқотлари маркази илмий ходими Алексей Юрк “Дунё” АА мухбирига учун Ўзбекистон Президенти Шавкат Мирзиёевнинг 17–19 февраль кунлари АҚШга амалга оширган ташрифи ва Тинчлик кенгашининг биринчи йиғилишдаги иштироки ҳақида фикр билдирди:

– Ўзбекистон Президенти Шавкат Мирзиёевнинг Вашингтонга ташрифи дастури шуни кўрсатадики, Тинчлик кенгаши фаолияти икки ўлчовга эга. Айни пайтда унинг иштирокчилари учун қайси бири аҳамиятлироқ эканини айтиш қийин.

Бир томондан, унинг асосчиси, АҚШ Президенти Дональд Трампнинг баёнотларига кўра, ташкилотнинг мақсади можароларни тинч йўл билан ҳал қилишдир – аввал Ғазода, кейин эса бутун дунёда. Бошқа томондан, Тинчлик кенгаши саммитлари иштирокчи давлатлар учун ўзаро ва АҚШ билан ҳамкорликни мустаҳкамлаш учун ажойиб имкониятдир.

Бугунги кунда юзага келган геосиёсий вазиятда улар Америка етакчиси ва унинг режаларига содиқлигини намойиш этиш, шунингдек, ўз иқтисодиётини ривожлантиришга ҳисса қўшадиган Америка фирмалари билан қатор шартномалар тузиш имкониятини қўлдан бой бермаслиги керак.

Шундай қилиб, Ўзбекистон Президентининг бу ҳаракатларини узоқни кўзлаб ва мамлакатнинг халқаро майдондаги мавқеини яхшилашга қаратилган қадам сифатида баҳолаш мумкин.