АШХОБОД, 14 май. /"Дунё" АА/. Туркманистон пойтахтида Ўзбекистоннинг экспорт ва инвестициявий салоҳиятига бағишланган тақдимоти ўтказилди, деб хабар қилмоқда "Дунё" АА мухбири.

"Altyn Inne" журнали ташаббуси билан ўтказилган мазкур анжуманда Туркманистоннинг етакчи тадбиркор аёллари иштирок этди.

Мамлакатимиз элчихонаси ходимлари томонидан Ўзбекистоннинг экспорт салоҳияти ва инвестиция имкониятларига бағишланган тақдимот ўтказилди. Унда мамлакатимизда ишлаб чиқарилаётган замонавий саноат маҳсулотлари ва хорижий инвесторларга яратилган шарт-шароитлар ва имтиёзлар тўғрисида сўзлаб берилди.

Шунингдек, йиғилганлар эътиборига Ўзбекистон экспортчи корхоналарининг тижорат таклифлари ва мамлакатимиз ҳудудларида амалга оширилиши режалаштирилган инвестициявий лойиҳалар бўйича маълумотлар тақдим қилинди.

Тадбир доирасида таниқли туркман дизайнери Аваза Мухамметниязованинг ўзбек ва туркман миллий либосларидан иборат модалар намойиши ҳамда Хошгелди Гаражаевнинг Ўзбекистоннинг сайёҳлик ва диққатга сазовор жойларига бағишланган фотокўргазмаси бўлиб ўтди.