MOSKVA, 18-aprel. /«Dunyo» AA/. Moskva avtomobil yo‘llari davlat texnika universitetida (MADI) "Mening vatanim" xalqaro talabalar festivali bo‘lib o‘tdi, deb xabar bermoqda «Dunyo» AA muxbiri.

Tadbir davomida o‘zbekistonlik talabalar mamlakatimizning madaniy va sayyohlik salohiyatini namoyish etdi.

Festival dasturi jahon an’analarining yorqin kaleydoskopiga aylandi. Universitetning markaziy zalida xalq hunarmandchiligining keng ko‘lamli ko‘rgazmasi bo‘lib o‘tdi, unda san’at buyumlari, shuningdek, turli xalqlarning o‘ziga xos milliy taomlari namoyish etildi.

O‘zbekistonlik talabalarning taqdimoti tadbir ishtirokchilari va mehmonlarining diqqat markaziga aylandi. Ular tomonidan bezatilgan O‘zbekiston milliy stendi mehmonlar e’tiborini tortdi, milliy liboslar va jo‘shqin raqslar haqiqiy hayrat uyg‘otdi.

Shuningdek, tadbir doirasida O‘zbekistonning turizm salohiyatiga bag‘ishlangan tarqatma materiallar bilan maxsus hudud tashkil etildi.

Ta’kidlash joizki, MADI Rossiyaning xorijiy kadrlar tayyorlash bo‘yicha yetakchi oliy ta’lim muassasalaridan biri hisoblanadi. Bugungi kunda universitet 67 ta davlat uchun mutaxassislar tayyorlamoqda.

2007-yilda boshlangan "Mening vatanim" festivali ko‘p millatli talabalar muhitida madaniyatlararo muloqotni mustahkamlash, ma’naviy qadriyatlarni boyitish va do‘stlikni rivojlantirish uchun muhim platformaga aylandi.