VARSHAVA, 8-mart. /“Dunyo” AA/. Polsha poytaxtida O‘zbekiston elchixonasi va Musulmonlar idorasi vakillari tomonidan vatandoshlarimiz uchun ma’naviy-ma'rifiy uchrashuv tashkil etildi, deb xabar bermoqda “Dunyo” AA muxbiri.

Unda Polshada mehnat qilayotgan va ta’lim olayotgan 100 nafardan ortiq vatandoshlar ishtirok etdi.

Yig‘ilganlar muqaddas Ramazon oyining inson hayotidagi ahamiyati, shukronalik, sabr-toqat, bag‘rikenglik va o‘zaro hurmat kabi fazilatlarning muhimligi haqida so‘z yuritdi.

Ishtirokchilar bunday ma’naviy-ma'rifiy tadbirlarni tashkil etilayotgani uchun davlatimiz rahbari va hukumatimizga alohida minnatdorlik bildirdi.

Mazkur uchrashuvning vatandoshlar o‘rtasida hamjihatlikni mustahkamlash, o‘zaro do‘stlik aloqalarini yanada yuksaltirish, milliy va ma’naviy qadriyatlarni asrab-avaylashda muhim ahamiyat kasb etishi ta’kidlandi.