IPSUICH, 8-fevral. /“Dunyo” AA/. O‘zbekiston diplomatlari Buyuk Britaniyaning Saffolk grafligiga xizmat safari doirasida qishloq xo‘jaligi texnikasi ishlab chiqarishga ixtisoslashgan mashhur “Claydon Drills” kompaniyasi rahbariyati bilan muzokaralar o‘tkazildi, deb xabar bermoqda “Dunyo” AA muxbiri.

Kompaniya asoschisi va rahbari Jeff Kleydon bilan kechgan muloqotda agrosanoat sohasidagi ikki tomonlama hamkorlik istiqbollari, innovatsion texnologiyalarni joriy etish va tajriba almashish masalalari muhokama qilindi.

Bugungi kunda kompaniya mahsulotlari Yevropa, Avstraliya va Ukraina kabi qishloq xo‘jaligi rivojlangan bozorlarga muvaffaqiyatli eksport qilinmoqda.

Uchrashuv yakunida Britaniya tomoni Markaziy Osiyo, xususan, O‘zbekiston bozoriga kirishga katta qiziqish bildirdi. Jeff Kleydon yaqin vaqt ichida yurtimizga amaliy tashrif uyushtirish, mahalliy fermer xo‘jaliklari va soha mutasaddilari bilan qo‘shma loyihalarni amalga oshirish imkoniyatlarini o‘rganishga tayyor ekanini maʼlum qildi.