OSTONA, 26-aprel. /“Dunyo” AA/. Qozog‘istonning “Liter” nashrida Toshkentda ikki mamlakat strategik moliyaviy institutlari o‘rtasida imzolangan muhim kelishuvlar va iqtisodiy integratsiya istiqbollariga bag‘ishlangan maqola e’lon qilindi, deb xabar bermoqda “Dunyo” AA muxbiri.

Nashrda yozilishicha, Qozog‘iston Eksport-kredit agentligi (EKA) boshqaruvi raisi Allen Chayjunusov va Qozog‘iston Taraqqiyot banki boshqaruvi raisi Marat Yelibayev Toshkentda O‘zbekistonning yetakchi banklari bilan hamkorlik to‘g‘risidagi uch tomonlama memorandumlarni imzoladi.

Mazkur hujjatlar Markaziy Osiyoda iqtisodiy integratsiyani kengaytirish va xususiy sektorni qo‘llab-quvvatlash bo‘yicha strategik ustuvor yo‘nalishlarni belgilab beradi.

Maqolada qayd etilishicha, O‘zbekiston Qozog‘istonning asosiy savdo-iqtisodiy sheriklaridan biridi. 2025-yil yakunlariga ko‘ra, EKA o‘zbek tomoni bilan ishlayotgan qozog‘istonlik eksportchilarni 300 million dollar miqdorida qo‘llab-quvvatlagan.

Bu ijobiy dinamika 2026-yilda ham davom etmoqda: yil boshidan buyon qo‘llab-quvvatlash hajmi 26 million dollarga yetdi. Hozirda agentlik O‘zbekistonning 6 ta markaziy banki bilan muvaffaqiyatli hamkorlik qilmoqda va o‘zaro tovar ayirboshlash barqarorligini ta’minlamoqda.

Nashrning xulosa qilishicha, alohida bitimlardan tizimli platformaga o‘tish qozog‘istonlik kompaniyalarning O‘zbekiston va xalqaro bozorlarda uzoq muddatli hamda barqaror ishtirok etishi uchun mustahkam asos yaratadi.

Bunda “Bayterek” xoldingi tarkibidagi rivojlanish institutlari yagona moliyaviy kontur sifatida chiqib, tashqi iqtisodiy faoliyat ishtirokchilari uchun xavflarni kamaytirish va moliyalashtirish imkoniyatlarini kengaytirishni kafolatlaydi.