ДУШАНБЕ, 16 ноябрь. /"Дунё" АА/. Тожикистон Республикаси Фанлар академияси Фалсафа, сиёсатшунослик ва ҳуқуқ институтиилмий ходими Виктор Ким "Дунё" АА учун интервьюсида Ўзбекистон Президентининг "Марказий Осиё янги давр остонасида" номли мақоласи ҳақида фикр билдирди:

– Тошкентда бўлиб ўтадиган Марказий Осиё давлатлари раҳбарларининг еттинчи Маслаҳат учрашуви арафасида эълон қилинган Ўзбекистон Президентининг "Марказий Осиё янги давр остонасида" сарлавҳали мақоласи халқаро экспертлар эътиборини тортди.

Давлат раҳбари мақолада таъкидлаганидек, Марказий Осиё ўз тараққиётининг янги, тарихий аҳамиятга молик даврига қадам қўймоқда. Бугун биз чинакам бирдамлик босқичига ўтяпмиз. 

Асосий фактлар, воқеалар, Марказий Осиё минтақасининг 2017 йилдан 2025 йилгача бўлган ривожланиш жараёнлари мақолада изчил, мантиқий ва аниқ акс эттирилган. Маслаҳат учрашувлари ташкил этилган 2017 йил минтақавий ҳамкорлик тарихида муҳим бурилиш бўлди. Минтақа етакчилари илк бор ташқи воситачиларсиз тизимли ва мунтазам мулоқотни ташкил этишди. Бу очиқ, ишончли ва умумий манфаатларни англашга асосланган янгича сиёсий жараённи тақдим этди. Мазкур Маслаҳат учрашувлари давомида эски пайтдан қолган гина-қудуратларга чек қўйилди, ишончсиз муносабатдан ҳақиқий ҳамкорликка ўтилди.

Минтақавий ҳамкорлик борасида бошланган янги босқичнинг энг муҳим ютуқларидан бири – чегара масалаларининг узил-кесил ҳал этилганидир. 2025 йил март ойида Ўзбекистон, Қирғизистон ва Тожикистон ўртасида уч давлатнинг чегаралари туташган нуқта тўғрисидаги Шартнома ва Хўжанд декларациясининг имзолангани тарихий аҳамиятга молик ҳодиса бўлди.

Ўзбекистон Президенти Шавкат Мирзиёевнинг мақоласи аллақачон Янги Марказий Осиёнинг шаклланиш ва ривожланиш жараёнини илмий идрок этишни талаб қилмоқда. Янги Марказий Осиё қиёфасини белгилаб берувчи "Давлат раҳбарларининг маслаҳат учрашуви "Марказий Осиё жараёни", "Янги сиёсий тафаккур", "Марказий Осиё плюс", "Янги иқтисодий воқелик", "Янги минтақавий ўзига хослик" каби тушунчалар илмий ва сиёсий муомалага киритилмоқда.

Янги Марказий Осиё – ишончли, очиқ ва умумий манфаатларни англашга асосланган сиёсий тафаккур тимсолига айланмоқда. Марказий Осиё давлатлари раҳбарларининг амалий ҳаракатлари минтақада тинчлик, барқарор тараққиёт ва ишончли шериклик йўлини белгилаб бермоқда. Шавкат Мирзиёев таъбири билан айтганда, биз девор эмас, кўприк барпо этмоқдамиз.